नंदूरबार l प्रतिनिधी
ट्रॅव्हल्समधून शेतकऱ्याचे पैसे चोरणारा आंतरराज्यीय गुन्हेगारास 4 लाखांच्या रोकडसह जेरबंद करण्यात स्थानिक गुन्हे शाखेला यश आले आहे.
याबाबत अधिक माहिती अशी की, राजेश बालमुकुंद शर्मा रा. कावसडी ता. जिंतूर, जि. परभणी ह. मु.शक्ती नगर, उधना सुरत हे मागील 12 वर्षापासून सुरत येथे अगरबत्ती व देवपुजा भंडार विक्रीचे चालवून कुटुंबाचा उदरनिर्वाह करीत होते, परंतु कर्जामुळे त्यांच्यावर गावाकडील शेत विकण्याची वेळ आली. कर्जातून बाहेर निघण्यासाठी त्यांनी गावाकडील एक एकर शेती विक्री केली व 1 लाख 50 हजार रुपये स्वत: च्या पँटच्या खिशात व 4 लाख रुपये बॅगेत असे एकुण 5 लाख 50 हजार रुपये घेवून 27 एप्रिल रोजी सायंकाळी 7 वा. सुमारास परभणी येथून सुरत येथे जाण्यासाठी निघाले. 28 एप्रिल रोजी पहाटे 6.45 वा. सुमारास नवापूर पोलीस ठाणे हद्दीतील हॉटेल श्री साई सिताराम येथे राजेश शर्मा हे चहा पिण्यासाठी उतरले व परत जावून आपल्या जागेवर बसले.
बसल्यानंतर त्यांनी त्यांची बॅग उघडून पाहिली असता बॅगेत ठेवलेले 4 लाख रुपये दिसून आले नाही. म्हणून त्यांनी ट्रॅव्हल्समधील इतर प्रवाशांना व आजुबाजुला शोध घेतला असता ते मिळून आले नाही. राजेश शर्मा यांचे पैसे कोणी तरी अज्ञात चोरट्याने चोरुन नेल्याची त्यांची खात्री झाल्याने त्यांनी तात्काळ फिर्यादीवरून नवापूर पोलीस ठाण्यात अज्ञात आरोपीतांविरुध्द् भा.दं.वि. कलम 379 अन्वये अज्ञात आरोपीताविरुध्द् गुन्हा दाखल करण्यात आला होता.
पोलीस अधीक्षक पी. आर. पाटील यांनी सदर गुन्ह्याचा गांभीर्याने तपास करुन गुन्ह्यातील सक्रीय गुन्हेगारांवर कारवाई करण्याबाबत स्थानिक गुन्हे शाखेचे पोलीस निरीक्षक किरणकुमार खेडकर व नवापूर पोलीस ठाण्याचे पोलीस निरीक्षक ज्ञानेश्वर वारे यांना निर्देश देवून परभणी, गुजरात, मध्य प्रदेश राज्यात पथके रवाना केली.
तपासकामी गेलेली पथके परभणी ते नवापूर या दरम्यान ट्रॅव्हल्स ज्या ज्या ठिकाणी थांबली त्या त्या ठिकाणचे सी.सी.टी.व्ही. तपासत होते. तसेच बाहेर राज्यात गेलेले पथके ही अशा प्रकारच्या गुन्हे पध्द्तीमधील निष्पन्न आरोपीतांची माहिती काढत होते, परंतु उपयुक्त अशी माहिती हाती लागत नव्हती. गुन्हा दाखल 20 दिवस झाले तरी देखील कुठलाच ठाव ठिकाणा लागत नव्हता.
16 मे रोजी नंदुरबार जिल्ह्याचे पोलीस अधीक्षक पी. आर. पाटील यांना गुप्त बातमीदारामार्फत माहिती मिळाली की, मागील सुमारे 20 ते 25 दिवसापूर्वी नवापूर पोलीस ठाणे हद्दीतील हॉटेल श्री. साई सिताराम येथील ट्रॅव्हल्समधून चोरी करणारा चोरटा हा मध्य प्रदेश राज्यातील धार जिल्ह्याचा आहे अशी मिळाल्याने पोलीस अधीक्षक पी. आर. पाटील यांनी स्थानिक गुन्हे शाखेचे पोलीस निरीक्षक किरणकुमार खेडकर यांना कळवून एक पथक तयार करुन बातमीची खात्री करून तात्काळ संशयीताला ताब्यात घेवून योग्य ती कारवाई करण्याचे आदेश दिले.
स्थानिक गुन्हे शाखेच्या पथकाने मध्य प्रदेश राज्यातील धार जिल्हयात सतत तीन दिवस थांबून स्थानिक पोलीसांच्या मदतीने आरोपीचे नाव निष्पन्न केले, परंतु संशयीत आरोपी घरी मिळून येत नव्हता. बातमीरामार्फत समजून आले की, संशयीत आरोपी हा 18 मे रोजी रात्री त्याच्या घरी येणार असल्याची माहिती मिळाल्याने स्थानिक गुन्हे शाखेच्या पथकाने स्थानिक पोलीसांच्या मदतीने त्याच्या घराच्या आजुबाजुला सापळा रचला व 19 मे रोजी 1 वा. संशयीत आरोपीतास ताब्यात घेण्यास पथकांना यश आले. आरीफ कालू खान यास ताब्यात घेऊन गुन्ह्याबाबत विचारपूस केली असता त्याने चोरी केलेबाबत सविस्तर हकिगत सांगितली. तसेच चोरी केलेले पैशांंबाबत विचारले असता ते त्याच्या घरात ठेवलेले असल्याबाबत सांगितल्याने 4 लाख रुपये हस्तगत करण्यात आले असून संशयित आरोपी व हस्तगत करण्यात आलेला मुद्देमाल गुन्ह्याचा पुढील तपासकामी नवापूर पोलीस ठाण्याच्या ताब्यात देण्यात आले आहे.
मध्य प्रदेश राज्यात जावून आरोपीता ताब्यात घेवून गुन्ह्यातील चोरीस गेलेले 4 लाख रुपये हस्तगत करुन उत्कृष्ट कामगिरी करणाऱ्या स्थानिक गुन्हे शाखा व नवापूर पोलीस ठाण्याच्या पथकास पोलीस अधीक्षक पी. आर. पाटील यांनी रोख बक्षिस जाहीर केले.
गुन्ह्यातील फिर्यादी राजेश शर्मा यांना सदरची माहिती मिळाल्यानंतर त्यांनी तात्काळ पोलीस अधीक्षक गाठून पोलीस अधीक्षक पी. आर. पाटील यांची भेट घेतली राजेश शर्मा यांचे चोरी झालेले 4 लाख रुपये हस्तगत करुन आरोपीतास बेड्या ठोकल्यामुळे त्यांनी नंदुरबार जिल्हा पोलीस दलाचे अभिनंदन करुन आभार व्यक्त केले.
सदरची कामगिरी पोलीस अधीक्षक पी. आर. पाटील, अपर पोलीस अधिक्षक निलेश तांबे, नंदुरबार विभागाचे उप विभागीय पोलीस अधिकारी सचिन हिरे यांच्या मार्गदर्शनाखाली स्थानिक गुन्हे शाखेचे पोलीस निरीक्षक किरणकुमार खेडकर, नवापूर पोलीस ठाण्याचे पोलीस निरीक्षक ज्ञानेश्वर वारे, स्थानिक गुन्हे शाखेचे सहा. पोलीस निरीक्षक संदीप पाटील, पोलीस हवालदार मुकेश तावडे, महेंद्र नगराळे पोलीस नाईक जितेंद्र ठाकुर, पोलीस अंमलदार अभय राजपुत नवापूर पोलीस ठाण्याचे पोलीस हवालदार दादाभाऊ वाघ, पोलीस नाईक विनोद पराडके यांच्या पथकाने केली आहे.
