नंदुरबार l प्रतिनिधी
धडगाव तालुक्यातील भुजगाव येथील सुनिल पेचरा पाडवी यांच्या घराला काल रात्री 8 वाजेच्या सुमारास आग लागून संपूर्ण घर जळून खाक झाल्याची दुर्दैवी घटना घडली आहे.
सुनिल पेचरा पाडवी यांचे संपूर्ण कुटुंब बाहेर गेलेले असतांना घरात कोणी नसतांना सदर घटना घडली. घराला लागलेल्या आगीत जीवनावश्यक वस्तू,धान्य,महत्वाची कागदपत्रे आणि कपडेलत्ते जळून खाक झाल्याची प्राथमिक माहिती प्रत्यक्ष दर्शिनी दिली आहे.
आगीचे कारण अद्याप समजू शकलेले नाही. परंतु प्रत्यक्ष दर्शनी दिलेल्या माहितीनुसार काल रात्री 8 वाजेच्या सुमारास अंधारात आगीचे लोळ उठल्याने आजूबाजूच्या नागरिकांना दिसून आल्यानंतर. जवळपासच्या नागरिकांनी आग विझविण्यासाठी मिळेल त्या भांड्यांमध्ये पाणी आणून आग विझविण्याचा प्रयत्न केला.
परंतु सुनिल पेचरा पाडवी यांचे घर टेकडीवर असल्याने वाऱ्यामुळे आगीने संपूर्ण घर भस्मसात झाल्याने आगीवर नियंत्रण मिळविणे कठीण झाले होते. धडगाव नगरपंचायतीच्या अग्निशमकदलाला संपर्क केल्याने तात्काळ अग्निशमकदलाची दाखल होत संपूर्ण आग विझवली तो पर्यंत घरातील जीवनावश्यक वस्तू धान्य,घराचे दांड्यालाकूडसह जळून खाक झाल्याने लाखोंचे नुकसान झाले आहे. सुनिल पेचरा पाडवी या गरीब परिवाराच्या घराला आग लागून उभा संसार काही मिनिटातच जळून राख झाला आहे. अंगावरच्या कपडयाव्यतिरिक्त काहीही वाचलेले नाही.महसूल विभागाच्या वतीने सदर आगीमुळे नुकसान झालेल्यांना पंचनामा करून नुकसान भरपाई द्यावी अशी मागणी ग्रामस्थांनी केली आहॆ.
काल रात्री ८ वाजेच्या सुमारास घटना घडल्याचे समजताच नगरपंचायतीच्या अग्निशमकदलाला संपर्क करून बोलावण्यात आले परंतु तो पर्यंत पूर्ण घर आणि जीवनावश्यक वस्तू जळून राख झाली. कुटुंब उघड्यावर आले असून सामाजबांधवानी सढळ हातानी मदत करावी असे आवाहन सरपंच अर्जुन पावरा यांनी केले.
