नंदुरबार l प्रतिनिधी
नंदुरबार-दोंडाईचा रस्त्यावरील न्याहली गावाजवळ आयशरने धडक दिल्याने दुचाकीस्वाराचा मृत्यू झाल्याची घटना घडली. तर या अपघातात दोघांना दुखापत झाली आहे.
याबाबत पोलिस सूत्रांनी दिलेल्या माहितीनूसार, बडोदा येथील जिग्नेश भिकूभाई वायडे हे दुचाकीने भारतीबाई जिग्नेश वायडे व मित जिग्नेश वायडे यांना बसवून नंदुरबार ते दोंडाईचा रस्त्याने जात होते. यावेळी एका आयशरवरील चालकाने त्याच्या ताब्यातील आयशर वाहन (क्र.एम.एच.०४ ईवाय ३२०६) रस्त्याच्या परिस्थितीकडे दुर्लक्ष करुन भरधाव वेगात वाहन चालवून न्याहली गावाजवळ दुचाकीला समोरुन धडक दिल्याने अपघात घडला. घडलेल्या अपघातात जिग्नेश वायडे यांचा मृत्यू झाला.
तर भारतीबाई वायडे व मित वायडे यांना दुखापत झाली. तसेच दुचाकीचेही नुकसान झाले आहे. अपघातानंतर वाहन चालक घटनास्थळावरुन पसार झाला. याबाबत जयेश उर्फ गोरख पुंडलिक खेडकर यांच्या फिर्यादीवरुन नंदुरबार तालुका पोलिस ठाण्यात आयशर वाहन चालकाविरोधात भादंवि कलम ३०४ (अ), २७९, ३३७, ३३८, ४२७ सह मोटार वाहन कायदा कलम १८४, १३४/१८७ प्रमाणे गुन्हा दाखल करण्यात आला आहे. पुढील तपास सहाय्यक पोलसि उपनिरीक्षक कमलाकर चौधरी करीत आहेत.
