नंदूरबार l प्रतिनिधी
दरवर्षी महाराष्ट्र शासनातर्फे सांस्कृतिक कार्य संचालनालय आयोजित महाराष्ट्र राज्य बालनाट्य स्पर्धेचे आयोजन करण्यात येते. सदर स्पर्धेत प्रथमच नंदुरबार जिल्ह्यातील ‘ओसामा’ या बालनाट्याच्या माध्यमातून या स्पर्धेत नंदुरबार जिल्ह्याचे प्रतिनिधीत्त्व करण्यात आले.
दि.१० ते १३ जानेवारी २०२३ दरम्यान १९ व्या महाराष्ट्र राज्य बालनाट्य स्पर्धेचे छत्रपती संभाजी महाराज नाट्यगृह, जळगांव येथे आयोजन करण्यात आले होते. या स्पर्धेत नंदुरबार जिल्ह्यातून प्रथमच गाडगेबाबा शैक्षणिक व सांस्कृतिक सेवा मंडळ शिंदे, ता.जि.नंदुरबार निर्मित ‘ओसामा’ या बालनाट्याचे सादरीकरण करण्यात आले. सदर बालनाट्याचे लेखन आसेफ शेख (अन्सारी) यांनी केले आहे. दिग्दर्शन-राजेश जाधव, नेपथ्य-नागसेन पेंढारकर, प्रकाशयोजना-मनोज सोनार, संगीत-जितेंद्र खवळे, रंगभूषा-तुषार सांगोरे, पार्थ जाधव, वेशभूषा-चिदानंद तांबोळी, रोहित हराळे यांनी केले होते.
या बालनाट्यात निलराज पटेल, उत्कर्षा भारती, तनिष्का पेंढारकर, दिया सुर्यवंशी, श्रेयस वाघमारे, प्राप्ती तांबोळी, लोकेश पाटील, उदय हराळे, शशांक जाधव, स्मित पटेल, प्रित तांबोळी, आयुष पाटील, प्रियांशु मच्छले, दुर्गेश हराळे या बालकलावंतांनी आपला नाट्याविष्कार सादर करुन नाट्य रसिकांची दाद मिळविली. गेल्या अनेक वर्षांपासून गागडेबाबा शैक्षणिक व सांस्कृतिक सेवा मंडळातर्फे बालनाट्य प्रशिक्षण शिबिराचे आयोजन करण्यात आले येत होते. त्याच प्रशिक्षण शिबिरातील बालकलावंतांनी या बालनाट्यात सहभाग घेतला होता. नंदुरबार जिल्ह्यातून प्रथमच या महाराष्ट्र राज्य बालनाट्य स्पर्धेत या बालनाट्याच्या माध्यमातून प्रतिनिधीत्व करण्यात आले.
