नंदुरबार | प्रतिनिधी
नवापूर तालुक्यातील सुळी ते कोळदा रस्त्यावर अवैधरित्या रॉयल्टी न भरता वाळूची वाहतूक करणाऱ्या ट्रॅक्टरला अटकाव केला असता तलाठ्यांसह कोतलवालास दमबाजी करुन जिवेठार मारण्याची धमकी व शासकीय कामात अडथळा निर्माण केल्याने ट्रॅक्टर चालकासह दोघांविरोधात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, नवापूर तालुक्यातील सुळी ते कोळदा रस्त्यावर ट्रॅक्टरवरील चालक त्याच्या ताब्यातील ट्रॅक्टरमध्ये (क्र.एम.एच.३९ एबी १७१३) रॉयल्टी न भरता वाळूची अवैधरित्या वाहतूक करतांना आढळून आला. यावेळी करंजी येथील तलाठी देविदास फत्तेसिग गावित व कोतवाल अर्जुन वसावे यांनी ट्रॅक्टरला अटकाव केला असता ट्रॅक्टरचालक व ट्रॉलीमध्ये बसलेल्या दोघा इसमांनी देविदास गावित व अर्जुन वसावे यांना दमबाजी करीत जिवेठार मारण्याची धमकी दिली.
तसेच शासकीय कामात अडथळा निर्माण केला. याबाबत देविदास गावित यांच्या फिर्यादीवरुन नवापूर पोलिस ठाण्यात तिघा अज्ञातांविरोधात भादंवि कलम ३५३, ५०६, ३४ प्रमाणे गुन्हा दाखल करण्यात आला आहे. पुढील तपास पोलिस उपनिरीक्षक बळवंत वळवी करीत आहेत.
