नंदूरबार l प्रतिनिधी
नवापूर येथील लॉकअप तोडून पळालेल्या 1 गुन्हेगाराला स्थानिक गुन्हे शाखेने मध्य प्रदेश राज्यातून अटक केली असून लवकरच इतर आरोपींचा शोध घेण्यात येईल असे पोलीस अधीक्षक पी. आर. पाटील यांनी सांगितले.
याबाबत अधिक माहिती अशी की, 5 डिसेंबर रोजी रात्री नवापुर तालुक्यातील नवरंग गेट जवळ कोठडा शिवारातील MIDC कडे जाणारे रस्त्यावर हैदर उर्फ इस्त्राईल इस्माईल पठाण रा- कुंजखेडा ता. कन्नड जि. औरंगाबाद,इरफान इब्राहिम पठाण, युसुफ असिफ पठाण, गौसखों हानिफखॉ पठाण रा- ब्राम्हणी गराडा ता कन्नड जि. औरंगाबाद, अकिलखों ईस्माईलखॉ पठाण रा. कठोरा बाजार ता- भोकरदन जि. जालना हे भागात दरोडा टाकण्याच्या पूर्व तयारीत असतांना एक महिंद्रा कंपनीची ग्रे रंगाची स्कार्पिओ मोटार गाडी ( MH 13 N 7626) वाहनासह मिळून आले म्हणुन त्यांना ताब्यात घेवून त्यांच्याविरुध्द् नवापूर पोलीस ठाण्यात भादंवि क 399, 402 प्रमाणे गुन्हा दाखल करुन सकाळी 6.45 वा. अटक करण्यात आली होती.
परंतु 5 डिसेंबर रोजी 9.05 वा. सुमारास वर नमुद पाचही आरोपीतांनी नवापूर पोलीस ठाण्याचे लॉकअपची मागील खिडकी तोडून त्याद्वारे पलायन केले होते. म्हणून नवापूर पोलीस ठाण्यात भादंवि क 224 प्रमाणे गुन्हा दाखल करण्यात आला होता. अवघ्या दोन तासापूर्वी अटक केलेल्या दरोड्याच्या पूर्व तयारीत असलेल्या आरोपीतांनी लॉकअपची खिडकी फोडून पलायन केल्याने पोलीस यंत्रणा सतर्क झाली होती. सदर घटनेबाबत नवापूर पोलीस ठाण्याचे पोलीस निरीक्षक ज्ञानेश्वर वारे यांनी नंदुरबार जिल्ह्याचे पोलीस अधीक्षक पी. आर. पाटील, अपर पोलीस अधीक्षक निलेश तांबे व इतर अधिकाऱ्यांना तात्काळ कळविली.
घटनेचे गांभीर्य लक्षात घेता नंदुरबार जिल्ह्याचे पोलीस अधीक्षक पी. आर. पाटील, अपर पोलीस अधीक्षक निलेश तांबे, नंदुरबार विभागाचे उप विभागीय पोलीस अधीकारी सचिन हिरे, स्थानिक गुन्हे शाखेचे पोलीस निरीक्षक किरणकुमार खेडकर व स्थानिक गुन्हे शाखेचे पोलीस अधिकारी व अंमलदार तात्काळ घटनास्थळी दाखल झाले. आरोपीतांची गुन्हेगारी पार्श्वभूमी पाहता ते सराईत आरोपी असल्याचे निष्पन्न झाल्याने नंदुरबार जिल्ह्याचे पोलीस अधीक्षक पी. आर. पाटील यांनी फरार आरोपीतांचा शोध घेणेकामी स्थानिक गुन्हे शाखा व नवापूर पोलीस ठाण्याचे 6 वेगवेगळे पथके तयार करुन आरोपीतांचे मुळ गाव असलेले औरंगाबाद, जालना जिल्ह्यात, गुजरात, मध्य प्रदेश राज्यात रवाना करुन केले.आरोपीतांचा नवापूर तालुक्यात व नवापूर तालुक्याच्या सीमावर्ती भागात सर्वत्र शोध मोहिम राबवून नवापूर तालुक्यातील सर्व परिसत पिंजून काढला.
लॉकअप तोडून पळालेला आरोपी नामे हैदर ऊर्फ इस्त्राईल ईस्माईल पठाण रा. कुंजखेडा ता. कन्नड जि. औरंगाबाद यास गुजरात राज्यातील उच्छल गावाच्या परिसरात स्थानिक पोलीसांच्या मदतीने पकडण्यात यश आले. परंतु फरार असलेले चार आरोपीतांना पकडण्याचे आव्हान पोलीसांसमोर होते.
८ डिसेंबर रोजी नंदुरबार जिल्ह्याचे पोलीस अधीक्षक पी. आर. पाटील यांना गुप्त बातमीदारामार्फत बातमी मिळाली की, नवापूर पोलीस ठाण्याचे लॉकअप तोडून पळालेल्या आरोपीतांपैकी एक आरोपी अकीखाँ पठाण हा मध्य प्रदेश राज्यातील खरगोन जिल्ह्यात खडकावाणी गावात त्याच्या नातेवाईकांकडे लपून बसल्याची खात्रीशिर बातमी मिळाल्याने त्यांनी स्थानिक गुन्हे शाखेचे पोलीस निरीक्षक किरणकुमार खेडकर यांना सदर माहिती कळवून स्थानिक गुन्हे शाखेचे तात्काळ एक पथक तयार करुन बातमीची खात्री करून तात्काळ फरार आरोपीतास ताब्यात घेवून योग्य ती कारवाई करण्याचे आदेश दिले.
स्थानिक गुन्हे शाखेच्या पथकाने स्थानिक पोलीसांच्या मदतीने मध्य प्रदेश राज्यातील खरगोन जिल्ह्यातील खडकावाणी गाव गाठून सुरुवातीला त्याच्या नातेवाईकांचा शोध घेतला असता खडकावाणी गावाच्या बाहेर जंगलातील शेतात राहात असल्याची माहिती काढली. स्थानिक गुन्हे शाखेच्या पथकाने त्याच्या नातेवाईकाचे खडकावाणी गावाच्या बाहेर जंगलातील शेताच्या आजूबाजूच्या परिसरात सापळा रचला. परंतु कुत्रे भुंकण्याच्या आवाजामुळे शेतातील झोपडीतून एक इसम पळतांना दिसून आल्याने पथकाने त्याचा पाठलाग करून त्यास शिताफीने ताब्यात घेतले.
ताब्यात घेतलेल्या इसमाला नाव गाव विचारले असता अकीलखों ईसमाईलखाँ पठाण रा. कठोरा बाजार ता. भोकरदन जि. जालना असे सांगितल्याने पथकाची खात्री झाली. म्हणून त्यास ताब्यात घेवून नवापूर पोलीस ठाण्याच्या ताब्यात देण्यात आले आहे. तसेच नवापूर पोलीस ठाण्याचे लॉकअप तोडून पळालेले उर्वरीत तीन आरोपीतांना देखील लवकरच बेड्या ठोकण्यात येतील असे नंदुरबार जिल्ह्याचे पोलीस अधीक्षक पी. आर. पाटील यांनी सांगितले.
सदरची कामगिरी नंदुरबार जिल्ह्याचे पोलीस अधीक्षक पी. आर. पाटील, अपर पोलीस अधिक्षक निलेश तांबे, नंदुरबार विभागाचे उप विभागीय पोलीस अधिकारी सचिन हिरे यांच्या मार्गदर्शनाखाली स्थानिक गुन्हे शाखेचे पोलीस निरीक्षक किरणकुमार खेडकर, सहा पोलीस निरीक्षक संदीप पाटील, पोलीस हवालदार मुकेश तावडे, पोलीस नाईक सुनिल पाडवी, विशाल नागरे, मोहन ढमढेरे, पोलीस अंमलदार अभय राजपुत, रामदास माळी यांच्या पथकाने केली आहे.
