नंदुरबार l प्रतिनिधी
शहरासह इतर जिल्ह्यात तब्बल ३१ घरफोड्या करणाऱ्या संशयितास स्थानिक गुन्हे शाखेने नंदूरबार येथील रेल्वेस्थानक परिसरातून अटक केली असून सहा घरफोडीचे गुन्हे उघडकीस आले आहेत.त्याच्याकडून आणखी काही गुन्हे उघडकीस येण्याची शक्यता आहे.
पोलीस सूत्रांच्या माहितीनुसार, दि.२०ऑक्टोबर रोजी महेश कोमलसिंग गिरासे यांच्या मालकीचे गांधीनगर परिसरातील रिक्षा स्टॉपजवळ असलेले मेडीकलच्या शटरचे कुलूप तोडून टेबलच्या ड्रॉव्हरमध्ये ठेवलेले १५ हजार रोख अज्ञाताने चोरुन नेल्याप्रकरणी शहर पोलीस ठाण्यात गुन्हा दाखल करण्यात आला होता.पोलीसांकडून तपास सुरू असतांना काल दि. २९ रोजी पोलीस अधीक्षक पी.आर.पाटील यांना मिळालेल्या माहितीनुसार सदरच्या चोरीतील संशयित हा रेल्वे स्टेशन परिसरात फिरत असल्याचे समजले.
त्यानुसार स्थानिक गुन्हे शाखेचे पोलीस निरीक्षक किरणकुमार खेडकर यांच्या नेतृत्वाखाली स्थानिक गुन्हे शाखेच्या रेल्वे स्थानक परिसरात संशयास्पदरित्या फिरत असलेल्या इसमास ताब्यात घेतले. तो मुकबधिर असल्याने त्याने त्याचे नाव लिहून दगडूबा मुकुंदा बोर्डे रा.पेरजापूर ता.भोकरदन जि.जालना असे सांगितले.त्याची झडती घेतली असता त्याच्याकडून सात हजार ५४० रुपयांची रोकड आढळून आली.त्याने हातवारे करुन व लिहून मेडीकल दुकान फोडल्याची कबुली दिली.
संशयित दगडूबा मुकुंदा बोर्डे हा मुकबधिर असल्याने नंदुरबार शहरातील मेडीकलमध्ये चोरीची कबुली दिली.तसेच त्यास मुकबधीर इसमांची भाषा माहिती असलेल्या मुकबधीर विद्यालयातील शिक्षकांकडून इतर चोरीच्या घटनांबाबत विचारपूस केली असता त्याने खांडबारा, अक्कलकुवा, रनाळे, जळगांव जिल्ह्यातील भुसावळ व साक्री जि.धुळे या ठिकाणी चोरी केल्याचे हातवारे करुन व कागदावर लिहून सांगितले. त्यावरून जिल्हा घटाकातील व इतर जिल्ह्यातील पोलीस ठाणे येथे गुन्हे अभिलेख पडताळून पाहिले असता तेथे नंदुरबार शहर पोलीस ठाणे, नंदुरबार तालुका पोलीस ठाणे, विसरवाडी, अक्कलकुवा, साक्री जि.धुळे, बाजार पेठ भुसावळ पोलीस ठाणे जि.जळगांव येथे ३१ गुन्हे दाखल आहेत.
पुढील तपासकामी त्यास नंदुरबार शहर पोलीस ठाण्याच्या ताब्यात देण्यात आले आहे.तसेच ताब्यात घेण्यात आलेल्या आरोपीतांकडून आणखी काही गुन्हे उघडकीस येण्याची शक्यता आहे, पोलीस अधीक्षक पी.आर.पाटील यांनी सांगितले. सदरची कामगिरी पोलीस अधीक्षक पी.आर.पाटील, अपर पोलीस अधिक्षक निलेश तांबे यांचे मार्गदर्शनाखाली स्थानिक गुन्हे शाखेचे पोलीस निरीक्षक किरणकुमार खेडकर, सहा. पोलीस निरीक्षक संदीप पाटील, पोलीस हवालदार महेंद्र नगराळे, पोलीस नाईक राकेश मोरे, मोहन ढमढेरे, पोलीस शिपाई अभय राजपुत, आनंदा मराठे यांच्या पथकाने केली आहे.
