नंदूरबार l प्रतिनिधी
दि सुप्रिम इंडस्ट्रीस लि. पुरस्कृत याहामोगी आदिवासी बहुउद्देशीय विकास संस्थेच्या फिरता दवाखाना व किशोरींचे आरोग्य शिक्षण उपक्रमांतर्गत मौजे पिंप्रापाणी व भांगारापाणी तालुका अक्कलकुवा येथे किशोरींची आरोग्य विषयक कार्यशाळा संपन्न झाली.
कार्यक्रमाच्या सुरुवातीस आशा कार्यकर्ती व किशोरींनी क्रांतिज्योती सावित्रीबाई फुले यांच्या प्रतिमेचे पूजन केले. रुषा पाडवी (किशोरी समन्वयक ) यांनी वैयक्तिक व सार्वजनिक स्वच्छता तसेच मासिक पाळीत घ्यावयाची काळजी या विषयी मार्गदर्शन केले.
रंजना नवेज (परिचारिका) यांनी विविध प्रकारचे आजार, थंडीच्या दिवसात त्वचेचे आजार व शरीराची घ्यावयाची निगा याविषयी मार्गदर्शन केले.
विठ्ठल कदम माजी अध्यक्ष बाल कल्याण समिती नंदुरबार यांनी मार्गदर्शन करताना सांगितले की बाल विवाह, बाल मजुरी ला आळा घातला पाहिजे. शासनाच्या शिक्षणासाठी आश्रमशाळा,स्कॉलरशिप, वसतिगृह तसेच उच्च शिक्षणासाठी सुविधा आहेत तर त्याचा लाभ घेतला पाहिजे.लहान मुला मुलींनी गुड टच बॅड टच बाबतीत जागृत असावे.आपले ध्येय प्रथम शिक्षण दुसरे नोकरी व व्यवसाय आणि नंतर विवाह असावे तरच बाल विवाहास आळा बसेल.
यादरम्यान वजन, उंची, BMI, BP, हिमोग्लोबिन तपासण्यात आले. या वर्षी सर्वांचे हिमोग्लोबिन 10 च्या वरती दिसून आले.
किशोरींनी दोरीवरील उड्या, फुटबॉल, लगोरी खेळून कार्यक्रमात उत्साहाने सहभाग घेतला तसेच आरोग्यविषयक पोस्टरांचे सामूहिक वाचन केले. कार्यशाळेची सांगता “बाल विवाह न करण्याच्या प्रतिज्ञा ” म्हणून केली.
कार्यशाळेचे आयोजन डॉ. वज्रेश्वरी वसावे व संस्थेच्या अध्यक्षा वंदना पावरा यांच्या मार्गदर्शनाखाली आशा कार्यकर्ती साबलीताई वसावे, सरिता पाडवी, मोहिनी पाडवी, फुलवंती वळवी, मीनाक्षी तडवी यांनी केले.
