नंदुरबार l प्रतिनिधी
शहादा तालुक्यातील देऊर येथील रहिवासी रवि राजपूत यांना ‘दादासाहेब फाळके आंतरराष्ट्रीय चित्रपट आणि दूरचित्रवाणी पुरस्कारातील चित्रपट सृष्टीत सर्वोत्कृष्ट गारमेंट सप्लायरचा पुरस्कार केंद्रीय सामाजिक न्याय आणि सक्षमीकरण राज्यमंत्री रामदास आठवले यांच्या हस्ते प्रदान करण्यात आला.
मुंबईत नुकताच विविध क्षेत्रात महत्त्वपूर्ण योगदान देणाऱ्या व्यक्तींना पुरस्कार प्रदान करण्यात आला. यावेळी चित्रपट अभिनेते अमन वर्मा, शांती प्रीया, रुपल पटेल, चारुल मलिक, शरद मल्होत्रा, रोहितेश गौर, विदिशा श्रीवास्तव, चारुल मलिक, अनुप उपाध्याय उपस्थित होते. रवी राजपूत हे देऊर ता. शहादा येथील एका शेतकरी कुटूंबात जन्मले. त्यांनी सुरत येथे कापड उद्योग क्षेत्रात अथक परिश्रम करून विविध उद्योग उभारले आहेत. ते साई ड्रेसेसचे संस्थापक तसेच मुख्य कार्यकारी अधिकारी आहेत.
त्यांच्या उद्योगामाफ्त आर्थिकदृष्ट्या दुर्बल महिलांना उद्योग उभारणीसाठी वस्तू उपलब्ध करून देतात. महिलांना प्रोत्साहन देऊन त्यांना घरबसल्या कपड्यांचा व्यवसाय करण्यास प्रवृत्त करतात. आता पर्यंत त्यांनी अनेकांना रोजगार उपलब्ध करून दिला आहे.
भारतीय वस्त्र आणि वस्त्र पुरवठादारामध्ये महत्त्वपूर्ण योगदानासाठी त्यांना बॉलीवूड पुरस्कार प्रदान करण्यात आला. त्यांना पुरस्कार मिळाल्याबद्दल सर्वत्र कौतुक होत आहे.
पुरस्कार नवीन उर्जा प्रदान करतो हा पुरस्कार मिळाल्याबद्दल आनंद व्यक्त करताना रवी राजपूत यांनी सांगितले की, आमच्या अथक परिश्रमाने आम्ही कापड उद्योगातील एक उत्कृष्ट उत्पादक म्हणून कार्य करीत आहोत. पुरस्कार आपल्याला एक नवीन ऊर्जा देतो आणि त्याचबरोबर भविष्यात आणखी चांगले काम करण्यासाठी प्रोत्साहन देतो.