नंदूरबार l प्रतिनिधी
धडगाव तालुक्यातील सूर्यपूर गावाजवळील वळण रस्त्यावर दोन दुचाकींची समोरासमोर धडक झाल्याने अपघातात एक जण गंभीर तर तीन जणांना किरकोळ दुखापत झाल्याची घटना घडली आहे.
याबाबत अधिक माहिती अशी की, धडगाव तालुक्यातील सूर्यपूर गावाजवळील वळण रस्त्यावर भरधाव वेगाने समोरून येणारे वाहन न दिसल्याने दोन दुचांकीमध्ये समोरासमोर धडक झाल्याने भीषण अपघात झाला आहे. या अपघातात २२ वर्षीय युवक फुलसिंग नमा पराडके हा गंभीर जखमी झाला आहे.
तर दुसऱ्या दुचाकी वरील माग्या राजा ठाकरे ( वय ३५ ), इंदिरा माग्या ठाकरे (वय ३०) व जयसिंग माग्या ठाकरे (वय ३ वर्ष) रा. पिंपलबारी या परिवारातील तिघांना मुका मार लागल्याने जखमी झाले आहे. अपघाताची माहिती मिळताच स्थानिक नागरिकांनी तात्काळ 108 रुग्णवाहिकेला फोन केल्याने पायलट संतोष पावरा, कुंदन वळवी व डॉ.राकेश तडवी यांनी जखमींना प्राथमिक उपचार करून पुढील उपचारासाठी धडगाव ग्रामीण रुग्णालयात पाठविण्यात आले आहे.