नंदूरबार l प्रतिनिधी
श्री.गणेश विसर्जन काळात नंदुरबार शहरात विक्री करण्यासाठी येणारा 36 हजार 550 रुपये किमतीचा 1 हजार 120 किलो भेसळयुक्त गुलाल पोलिसांनी जप्त केला आहे.
याबाबत अधिक माहिती अशी की, दि. 31 ऑगस्ट 2022 रोजी पासून सुरु होणाऱ्या गणेशोत्सव काळात नंदुरबार जिल्ह्याचे पोलीस अधीक्षक पी . आर . पाटील यांच्या संकल्पनेतून नंदुरबार जिल्हा पोलीस दलातर्फे यावर्षापासून गणेशोत्सव काळात गणेश मुर्तीची स्थापना / विसर्जन मिरवणूकीचे वेळी मुख्य मिरवणूकीत सहभागी होणाऱ्या सर्व व इतर नोंदणीकृत मंडळांना नंदुरबार जिल्ह्यातील सर्व पोलीस ठाणे हद्दीत गणराया पुरस्कार देण्यात येणार आहे .
त्यासाठी विविध निकषांचा विचार करण्यात येणार आहे , त्यात गणेश मुर्तीची स्थापना व विसर्जन मिरवणूकीत गुलालाचा वापर न करता फुलांच्या पाकळ्यांचा वापर करणे याचा देखील समावेश आहे . सण उत्सवात भेसळयुक्त गुलाल व रंग याचा अतिरेकी वापर यामुळे तक्रारी प्राप्त होत आहेत . त्याअनुषंगाने अशा प्रकारच्या कारवाया करण्याचे आदेश नंदुरबार जिल्ह्याचे पोलीस अधीक्षक पी . आर . पाटील यांनी दिले होते . दि. 5 सप्टेंबर रोजी पोलीस अधीक्षक शपी . आर . पाटील यांना गुप्त बातमीदारामार्फत बातमी मिळाली की , एक इसम ॲपे रिक्षामध्ये भेसळयुक्त गुलालाच्या गोण्या भरुन नंदुरबार शहरात विक्री करण्यासाठी येणार आहे. अशी माहिती मिळाल्याने, पोलीस अधीक्षक पी . आर . पाटील यांनी सदर बातमीबाबत सविस्तर माहिती घेवून स्थानिक गुन्हे शाखेचे पोलीस निरीक्षक रविंद्र कळमकर यांना त्यांच्या नेतृत्वाखाली पथक तयार करुन भेसळयुक्त गुलालाच्या वाहनावर कायदेशीर कारवाई करण्याचे आदेश दिले .
मिळालेल्या खात्रीशीर बातमीच्या आधारे स्थानिक गुन्हे शाखेचे पोलीस निरीक्षक श्री . रविंद्र कळमकर व त्यांच्या पथकाने नंदुरबार शहरातील हाट दरवाजा पोलीस चौकीजवळ सापळा रचला . स्थानिक गुन्हे शाखेचे पथक वाहनांची तपासणी करीत असतांना नंदुरबार शहरातील गांधी पुतळ्याकडून हाट दरवाजाकडे येणारे एक ॲपे रिक्षा वाहन येतांना दिसुन आल्याने स्थानिक गुन्हे शाखेच्या पथकातील अमंलदारांनी हाताच्या सहाय्याने त्यास उभे करण्याचा इशारा देवून सदर ॲपे रिक्षा वाहन थांबविले .
ॲपे रिक्षा चालकास स्थानिक गुन्हे शाखेच्या अमंलदारांनी आपली ओळख देवून चालकास नांव गांव विचारले असता त्याने त्याचे नाव इकबाल दाऊद कुरेशी रा . गाझी नगर नंदुरबार असे सांगितले . वाहन चालकास वाहनात काय आहे ? बाबत विचारपुस करता त्याने उडवा उडवीची उत्तरे दिली म्हणून पथकाने दोन पंचासमक्ष वाहनाच्या मागील बाजूस पाहणी केली असता
त्यात गुलालाच्या गोण्या भरलेल्या मिळून आल्या . ताब्यात घेण्यात आलेल्या इसमास त्याचे ॲपे रिक्षामध्ये मिळून आलेल्या गुलालाच्या गोण्या कोठून व कोठे घेवून जात आहे ? याबाबत विचारपूस केली असता त्याने काही एक समाधानकारक उत्तरे दिली नाही . तसेच गुलाल विकत घेतल्याबाबत सदर इसमाकडे बिल पावती मागितली असता त्याच्याकडे कोणतीही बिल पावती नसल्याचे त्याने सांगितले . सदर ॲपे रिक्षामध्ये 11 हजार 500 रुपये किमतीच्या 60 भेसळयुक्त गुलालाच्या गोण्या तसेच 25 हजार रुपये किमतीची एक ॲपे रिक्षा असा एकूण 36 हजार 500 रुपये किमतीचा मुद्देमाल ताब्यात घेण्यात आलेला आहे. व त्याबाबत कायदेशीर कारवाई करण्याची प्रक्रीया सुरु करण्यात आली आहे .
सदरची कामगिरी पोलीस अधीक्षक पी . आर . पाटील , अपर पो अधीक्षक विजय पवार , उप विभागीय पोलीस अधीकारी मार्गदर्शनाखाली स्थानिक गुन्हे शाखेचे पोलीस निरीक्षक रविंद्र कळमकर, पोह. वसावे , जितेंद्र तांबोळी , पोलीस नाईक राकेश मोरे , पोलीस शिपाई अभय राजपुत , आनंदा मराठे , रामेश्वर चव्हाण यांच्या पथकाने केली आहे .
गुलालाचा वापर केल्यामुळे मानवी त्वचेवर व शरीरावर दुष्परिणाम होतात . तसेच गुलालमुळे वायु प्रदुषण देखील मोठ्या प्रमाणावर होते . गुलालात विषारी रसायनांचा वापर मोठ्या प्रमाणावर केला जातो त्यामुळे कर्करोग , फुफ्फसाचे विविध आजार होण्याची शक्यता असते . गुलाल डोळ्यात गेल्यास डोळ्यांची दृष्टी देखील जाऊ शकते . गुलालामुळे विविध प्रकारचे रक्तांचे आजार देखील होऊ शकतात . त्यामुळे श्री.गणेश विसर्जन मिरवणूकीत गुलालाचा वापर न करता फुलांच्या पाकळ्यांचा वापर करावा . भेसळयुक्त गुलालाबाबत काही एक माहिती मिळाल्यास त्वरीत पोलीस नियंत्रण कक्ष , नंदुरबार 02564-210100 / – 210113 यावर संपर्क साधावा असे आवाहन करण्यात आले आहे .पोलीस अधीक्षक पी.आर.पाटील यांनी केली आहे.
