नंदूरबार l प्रतिनिधी
नंदुरबार जिल्ह्याची ओळख महाराष्ट्रात आदिवासी जिल्हा किंवा अतिदुर्गम जिल्हा म्हणून आहे . असे असतांना देखील नंदुरबार जिल्ह्याने ‘ गुन्हे आणि गुन्हेगार मागोवा नेटवर्क यंत्रणा ‘ अर्थातच ( CCTNS ) प्रणाली राबविण्यात महाराष्ट्रात दुसरा क्रमांक पटकावून उत्कृष्ट कामगिरी केलेली आहे .
CCTNS प्रणालीची सुरुवात महाराष्ट्रात सन 2015 मध्ये झाली असून CCTNS प्रणालीत पोलीस ठाणे स्तरावर दैनंदिन होणाऱ्या प्रत्यक घडामोडींची ऑनलाईन नोंदी घेण्यात येत असते , त्यात प्रथम खबर अहवाल ( FIR ) , स्टेशन डायरी नोंदी , अटक आरोपींच्या नोंदी , तसेच पोलीस ठाण्यात हस्तलिखीत होणाऱ्या सर्व नोंदी ह्या आता CCTNS प्रणालीत संगणकाद्वारे ऑनलाईन पध्द्तीने घेण्यात येत असतात .
प्रत्येक पोलीस ठाणे स्तरावर पोलीस ठाणे प्रभारी अधिकारी संबंधीत कर्मचाऱ्यांकडुन CCTNS प्रणालीत दैनंदिन डाटा फिडींगचे काम करुन घेत असतात आणी त्यावर प्रत्यक्ष पर्यवेक्षण नंदुरबार जिल्ह्याचे पोलीस अधीक्षक पी . आर . पाटील यांच्याकडुन होत असते . गुन्हेगारांवर वचक ते सामाजिक बांधीलकी सोबत नंदुरबार जिल्ह्याचे पोलीस अधीक्षक पी . आर . पाटील यांनी नंदुरबार जिल्हा पोलीस दलाला तंत्रज्ञानाला देखील मागे पडू दिलेले नाही .
महाराष्ट्रातील 36 जिल्हे व 11 पोलीस आयुक्तालयात महाराष्ट्र शासनाचा सुरु असलेला CCTNS प्रणाली राबविण्यात नंदुरबार जिल्ह्याने 232 पैकी 222 गुण प्राप्त करून महाराष्ट्र राज्यात दुसरा क्रमांक पटकाविला आहे . नंदुरबार जिल्ह्यात इंटरनेटचा स्पीड , सुरळीत नसणारा वीज पुरवठा व इतर अत्याधुनिक सुविधा नसतांना देखील CCTNS प्रणाली राबविण्यात नंदुरबार जिल्हा पोलीस दलाने महाराष्ट्र पोलीस दलात आपली एक – नवी ओळख निर्माण केलेली आहे आणि याचे संपूर्ण श्रेय अर्थातच नंदुरबार जिल्हा पोलीसांना जाते .
नंदुरबार जिल्हा पोलीस अधीक्षक कार्यालयात CCTNS चे मुख्य सर्व्हर असून त्याठिकाणी सहा . पोलीस निरीक्षक नयना देवरे व त्यांचे पथक असुन पोलीस ठाणे स्तरावर दैनंदिन ऑनलाईन फिडींगच्या कामावर ते देखरेख ठेवतात . तसेच पोलीस ठाण्याला येणारे तांत्रिक व इतर अडचणींबाबत ते पोलीस ठाण्याला जावून ते सोडवित असतात .
नंदुरबार सारख्या अतिदुर्गम किंवा आदिवासी जिल्ह्यात CCTNS प्रणाली राबवुन ती यशस्वी करणे हे एकप्रकारे नंदुरबार जिल्हा पोलीस दलासाठी आवाहन होते , कारण नंदुरबार जिल्ह्यातील धडगांव , मोलगी , अक्कलकुवा व इतर ग्रामीण भागात इंटरनेटच्या वेगाची मर्यादा नंदुरबार जिल्ह्यातील इतर पोलीस ठाण्यांपेक्षा कमी असते , त्यातच वारंवार खंडीत होणारा वीज पुरवठा अशा अनेक अडचणींवर मात करुन पोलीस प्रशासनाच्या दैनंदिन कामकाजाची दिलेल्या विहीत वेळेत व जास्तीत जास्त ऑनलाईन फिडींग करुन नंदुरबार जिल्हा CCTNS टीमने जुलै -2022 मध्ये संपूर्ण महाराष्ट्रात द्वितीय स्थान पटकावून उत्कृष्ट कामगिरी केलेली आहे .
सदरची कामगिरी नंदुरबार जिल्ह्याचे पोलीस अधीक्षक पी . आर . पाटील , नंदुरबार जिल्ह्याचे अपर पोलीस अधीक्षक विजय पवार , नंदुरबार विभागाचे उप विभागीय पोलीस अधिकारी सचिन हिरे , शहादा विभागाचे उप विभागीय पोलीस अधिकारी श्रीकांत घुमरे , अक्कलकुवा विभागाचे उप विभागीय पोलीस अधिकारी संभाजी सावंत , स्थानिक गुन्हे शाखा , नंदुरबारचे पोलीस निरीक्षक रविंद्र कळमकर यांचे मार्गदर्शनाखाली सहा . पोलीस निरीक्षक श्रीमती नयना देवरे , पोलीस नाईक राजेंद्र मोरे व नंदुरबार जिल्ह्यातील CCTNS चे काम पाहणारे पोलीस अमंलदार यांचे पथकाने केलेली आहे .
तसेच नंदुरबार जिल्ह्याचे पोलीस अधीक्षक पी. आर . पाटील यांनी सर्व टीमचे अभिनंदन करुन त्यांना रोख बक्षीस देखील जाहीर केले आहे .
