नंदुरबार l प्रतिनिधी
राज्य निवडणूक आयोगाच्या आदेशानुसार शहादा नगरपरिषद निवडणुकीचा कार्यक्रम जाहीर करण्यात आला आहे. गुरुवार 18 ऑगस्ट 2022 रोजी सकाळी 7-30 ते सायंकाळी 5-30 या वेळेत मतदान होणार असून संबंधित नगरपरिषद क्षेत्रात निवडणूक आचारसंहिता लागू करण्यात आली आहे.
नगरपरिषद निवडणूक कार्यक्रम असा राहील
अंतिम प्रभागनिहाय मतदार याद्या अधिप्रमाणित करुन मंगळवार 5 जुलै 2022 रोजी प्रसिद्ध करण्यात येईल. बुधवार 20 जुलै 2022 रोजी निवडणूक कार्यक्रम जारी करण्यात येईल. 22 जुलै 2022 (शुक्रवार) ते 28 जुलै 2022 (गुरुवार) रोजी सकाळी 11 ते दुपारी 3 वाजेपर्यंत 23 व 24 जुलै 2022 सुट्टीचे दिवस वगळून नामनिर्देशनपत्रे स्विकारण्यात येईल.
शुक्रवार 29 जुलै 2022 रोजी सकाळी 11 वाजेपासून नामनिर्देशनपत्र छाननी करण्यात येईल. व उमेदवाराची यादी प्रसिद्ध करण्यात येईल. गुरुवार 4 ऑगस्ट 2022 रोजी दुपारी 3 वाजेपर्यंत अपील नसेल तेथे नामनिर्देशपत्र मागे घेता येईल.
अपील असल्यास अपिलाचा निर्णय ज्या तारखेस करण्यात येईल त्या तारखेनंतर तिसऱ्या दिवशी किंवा तत्पूर्वी सोमवार 8 ऑगस्ट 2022 रोजी नामनिर्देशपत्र मागे घेता येईल.उमेदवारी मागे घेण्यासाठी शेवटच्या दिवसानंतरच्या लगतच्या दिवशी निवडणूक चिन्ह नेमून देण्यात येतील. तसेच अंतिमरित्या निवडणूक लढविणाऱ्या उमेदवारांची यादी प्रसिध्द करण्यात येईल.
गुरुवार 18 ऑगस्ट 2022 रोजी सकाळी 7.30 ते सायंकाळी 5.30 वाजेपर्यंत मतदान होईल, तर शुक्रवार 19 ऑगस्ट 2022 रोजी सकाळी 10 वाजेपासून मतमोजणी होणार असून निवडणुकीच्या निकालाची अधिसूचना कलम 19 मधील तरतुदीनुसार प्रसिद्ध करण्यात येईल.
शहादा नगरपरिषद क्षेत्रात निवडणुकीची आचारसंहिता लागू झाली असून ती निवडणुकीचा निकाल जाहीर होईपर्यंत अंमलात राहील. या निवडणुकीकरिता आचारसंहिता जरी संबंधित नगरपरिषद क्षेत्रात लागू झालेली असली तरी निवडणुक असलेल्या निवडणूक विभाग किंवा निर्वाचक नगरपरिषद मतदारांवर प्रभाव पडेल, अशा तऱ्हेचे कोणतेही धोरणात्मक निर्णय,
कोणतीही कृती, घोषणा संबंधित स्थानिक स्वराज्य संस्था, मंत्रीमंडळातील सदस्य, खासदार, आमदार अथवा कोणत्याही पदाधिकाऱ्यांना करता येणार नाही. महाराष्ट्र सार्वजनिक मालमत्ता विद्रुपीकरण कायद्यान्वये विनापरवाना सार्वजनिक मालमत्तेचे विद्रुपीकरण गुन्हा आहे याची नोंद घ्यावी. आचारसंहितेचे काटेकोरपणे पालन करण्यात यावे, असे जिल्हाधिकारी मनीषा खत्री यांनी कळविले आहे.
