नंदुरबार l प्रतिनिधी
आंतरराष्ट्रीय कृष्णभावनामृत संघाच्या इस्कॉन तर्फे जगन्नाथ रथयात्रेचे ५ जुलैला आयोजन करण्यात आले आहे. नंदनगरीत प्रथमच जगन्नाथ रथयात्रा निघणार असल्याने भाविकांमध्ये उत्साहाचे वातावरण आहे. भाविकांकडून तयारीला वेग दिला जात आहे.
इस्कॉनतर्फे अहमदाबाद, पुरी या सारख्या मोठ्या शहरांमध्ये जगन्नाथ रथयात्रा दरवर्षी काढण्यात येते त्याच धर्तीवर नंदुरबारात ५ जुलैला कृष्णभावनामृत संघाचे संस्थापक कृष्ण कृपामूर्ति श्रीमद् ए.सी भक्तिवेदांत स्वामी श्रील प्रभुपाद यांच्या प्रेरणेने रथयात्रेचे आयोजन करण्यात आलेले आहे. इस्कॉनच्या भाविक भक्तांकडून रथ यात्रेनिमित्त जनजागृती करण्यात येत आहे. जिल्ह्यातील दुर्गम अति दुर्गम भागापर्यंत भाविक ग्रामस्थांत पर्यंत पोहचून रथयात्रेची माहिती देत आहेत.
मंगळवार, दि. ५ जुलै रोजी दुपारी ३ वाजता शहरातील मोठा मंदिरापासून रथयात्रेला सुरुवात करण्यात येणार आहे. देसाईपुरा पेट्रोल पंप, दो शाह तकीय, शिवाजी रोड,जळका बाजार, सोनार गल्ली, बालाजीवाडा, महाराष्ट्र व्यायाम शाळा हाटदरवाजा मार्गे तालुका पोलिस कवायत मैदानापर्यंत रथयात्रा काढण्यात येणार आहे. सायंकाळी ७ वाजता तालुका पोलीस मैदानावर रथयात्रा आल्यानंतर ७.३० वाजता कथा प्रवचनाच्या कार्यक्रम होईल.रात्री ८ वाजता महाप्रसाद वितरण करण्यात येईल.नंदूरबार शहरात प्रथमच जगन्नाथ रथयात्रेचे आयोजन करण्यात येत असल्यामुळे भाविक भक्तांमध्ये मोठ्या प्रमाणावर उत्साह संचारला आहे. इस्कॉन च्या भक्त मंडळचे कार्यकर्ते रथयात्रेच्या प्रचार व प्रसार करीत आहेत. नागरिकांनी रथयात्रेत सहभागी होण्याचे आवाहन इस्कॉनचे प्रमुख भक्त सेवेकरी माधव श्यामसुंदर दास यांनी केले आहे.
सुरतहुन रथ येणार
इस्कॉनतर्फे दरवर्षी भगवान जगन्नाथाची रथयात्रा काढण्यात येते. अहमदाबाद, पुरी यांसारख्या मोठ्या शहरानंतर प्रथमच नंदनगरीत यात्रेचे आयोजन केले जात आहे. ३ जुलैला सुरतहून नंदुरबारात रथाचे आगमन होईल. रथाची आकर्षक सजावट करण्यात येणार आहे.
