नंदुरबार l प्रतिनिधी
अक्कलकुवा तालुक्यातील देवमोगरा पुनर्वसन गावाजवळ दुचाकी घसरल्याने तरुणाचा मृत्यू तर एक जण जखमी झाल्याची घटना घडली.
याबाबत अधिक माहिती अशी की, अक्कलकुवा तालुक्यातील बेडाकुंड येथील निलेश रत्या तडवी हा त्याच्या ताब्यातील दुचाकीने (क्र.जी.जे.०५-९४४४) त्याचा मित्र रमेश पाडवी असे दोघे अक्कलकुवा येथून बाजार करुन मोलगी रस्त्याने जात होते.
यावेळी निलेश पाडवी याने रस्त्याच्या परिस्थिीकडे दुर्लक्ष करुन भरधाव वेगात दुचाकी चालवून देवमोगरा पुनर्वसन गावाजवळ दुचाकी घसरल्याने अपघात घडला. घडलेल्या अपघातात निलेश तडवी याच्या डोक्याला गंभीर दुखापत झाल्याने रक्तस्त्राव होत असल्याने नंदुरबार जिल्हा रुग्णालयात उपचारासाठी दाखल करण्यात आले होते.
उपचारादरम्यान निलेश तडवी याचा मृत्यू झाला. तसेच त्याचा मित्र रमेश पाडवी यालाही दुखापत झाली. तसेच दुचाकीचेही नुकसान झाले.
याबाबत रत्या निंबा तडवी यांच्या फिर्यादीवरुन अक्कलकुवा पोलिस ठाण्यात मयत निलेश तडवी याच्याविरोधात भादंवि कलम ३०४ (अ), २७९, ३३७, ३३८, ४२७ सह मोटार वाहन कायदा कलम १८४ प्रमाणे गुन्हा दाखल करण्यात आला आहे. पुढील तपास पोहेकॉ.रमेश कडवे करीत आहेत.