नंदुरबार | प्रतिनिधी
राज्यस्तर यंत्रणेतील जिल्हा जलसंधारण अधिकारी, धुळे या कार्यालयाचे विभाजन करण्यात येऊन नंदूरबार येथे जिल्हा जलसंधारण अधिकारी कार्यालय नव्याने स्थापन करण्यात येणार आहे.
दरम्यान जिल्हा निर्मीतीच्या २४ वर्षांनंतर नंदुरबार जिल्ह्याला मृद व जलसंधारण विभागाचे नंदुरबार येथे नवीन कार्यालये सुरु होणार आहे.
मृद व जलसंधारण विभागाच्या अधिपत्याखाली राज्यस्तर यंत्रणेकडे एकूण २६ जिल्हा जलसंधारण अधिकारी कार्यालये तसेच १२७ उपविभागीय जलसंधारण अधिकारी कार्यालये कार्यरत आहेत.
तर जिल्हा परिषद यंत्रणेकडे एकूण ३१ जिल्हा जलसंधारण अधिकारी कार्यालये तसेच १६८ उपविभागीय जलसंधारण अधिकारी कार्यालये कार्यरत आहेत.
विभागाच्या राज्यस्तर यंत्रणेकडील कामकाजाची व्यापकता व यंत्रणेवरील कामाचा ताण कमी करण्याच्या उद्देशाने राज्यस्तर यंत्रणेकडील जिल्हा कार्यालये आणि उपविभागीय कार्यालये यांची संख्या काही प्रमाणात वाढ केल्यास राज्यस्तर यंत्रणा व जिल्हा परिषद यंत्रणा यांचा समतोल साधला जाऊन मनुष्यबळाचा योग्य वापर होण्यास मदत होणार आहे.
राज्यस्तर यंत्रणेमध्ये रायगड, नंदुरबार, परभणी, हिंगोली, भंडारा अशी पाच नवीन जिल्हा जलसंधारण अधिकारी कार्यालये कार्यान्वित करण्यात येणार आहेत.
राज्यस्तर यंत्रणेतील जिल्हा जलसंधारण अधिकारी, धुळे या कार्यालयाचे विभाजन करण्यात येऊन नंदूरबार येथे जिल्हा जलसंधारण अधिकारी कार्यालय नव्याने स्थापन करण्यात येणार आहे अशी माहिती मृद व जलसंधारण मंत्री शंकरराव गडाख यांनी दिली.
या नविन रचनेमुळे जलसंधारण विभागाचे कामकाज गतीमान होणार आहे. संबंधित लोकप्रतिनिधींची अनेक वर्षांची मागणी पूर्ण होत आहे.दरम्यान जिल्हा निर्मीतीच्या २४ वर्षांनंतर नंदुरबार जिल्ह्याला मृद व जलसंधारण विभागाचे नंदुरबार येथे नवीन कार्यालये सुरु होणार आहे त्यामळे जलसिंचन प्रकल्पांना चालना मिळुन नागरीकांना सोयीचे होणार आहे.
