नंदुरबार l प्रतिनिधी
येथील नगरपालिकेच्या प्रभाग क्रमांक 11 मधील सहा निराधार वृध्द महिला व पुरुषांना संजय गांधी निराधार योजनेचे दरमहा एक हजार रुपयांचे अनुदान मंजूर झाले आहे. या योजनेच्या अनुदानाचा लाभ लाभार्थ्यांना मिळवुन देण्यासाठी क्षत्रिय मराठा युवा प्रतिष्ठानचे संस्थापक अध्यक्ष प्रविण महेश मराठे यांनी केलेल्या पाठपुराव्याला यश आले आहे.
नंदुरबार शहरातील प्रभाग क्रमांक 11 मधील तांबोळी गल्ली, मराठा गल्ली, गणपती मंदिर, सिध्दीविनायक चौक परिसरातील राहणारे सहा निराधार वृध्द महिला व पुरुष हे संजय गांधी निराधार योजनेच्या लाभापासुन वंचित होते.
या लाभार्थ्यांनी संजय गांधी निराधार योजनेचे अनुदान मिळावे, यासाठी नंदुरबार तहसिल कार्यालयात संजय गांधी निराधार योजना समितीकडे प्रस्ताव सादर केला होता.
सदर प्रस्ताव मंजुर होवुन लाभार्थ्यांना अनुदान मिळावे, यासाठी संसदरत्न खा.डॉ.हिना गावित, माजी मंत्री तथा आ.डॉ.विजयकुमार गावित, जि.प.सदस्या डॉ.सुप्रिया गावित यांच्या मार्गदर्शनाखाली क्षत्रिय मराठा युवा प्रतिष्ठानचे संस्थापक अध्यक्ष प्रविण महेश मराठे यांनी पाठपुरावा केला.
या पाठपुराव्यानुसार लक्ष्मीबाई गिरधर मराठे, मिराबाई रणछोड तांबोळी, लताबाई अनिल भावसार, पार्वतीबाई भिमा मराठे, अंबादास नरहरी कासार, रणछोड गंगाराम तांबोळी या सहा लाभार्थ्यांची प्रकरणे मंजूर झाली आहेत.
सदर निराधार लाभार्थ्यांना संजय गांधी निराधार योजनेचे दरमहा मिळणारे 1 हजार रुपयांचे अनुदान मंजूर झाले आहे. अनुदान मंजूर झालेल्या लाभार्थ्यांना संसदरत्न खा.डॉ.हिना गावित, माजी मंत्री तथा आ.डॉ.विजयकुमार गावित व जि.प.सदस्या डॉ.सुप्रिया गावित यांच्या हस्ते मंजूर अनुदान पत्राचे वाटप करण्यात आले.
याप्रसंगी क्षत्रिय मराठा युवा प्रतिष्ठानचे संस्थापक अध्यक्ष प्रविण महेश मराठे आदी उपस्थित होते. प्रविण मराठे यांनी संजय गांधी निराधार योजनेच्या अनुदानाचा लाभासह विविध योजनांचे लाभ गरजूंना मिळवून देण्यासाठी पाठपुरावा केले आहेत. या पाठपुराव्यामुळे अनेक गोरगरिबांना योजनांचे लाभ मिळाले आहेत.