नंदुरबार l प्रतिनिधी
महाराष्ट्र नवनिर्माण सेनेचे अध्यक्ष राजसाहेब ठाकरे यांनी दिलेल्या आदेशानुसार नंदुरबार शहरात महाराष्ट्र नवनिर्माण सेनेच्या पदाधिकाऱ्यांनी हनुमान मंदिर हनुमान चालीसाचे वाचन केले. धुळे रस्त्यावरील हिंदू एकता मित्र मंडळाच्या हनुमान मंदिरात लाऊडस्पीकरवर हनुमान चालीसा म्हणण्यात आली. यावेळी परिसरात पोलिसांनी कडेकोट बंदोबस्त ठेवला होता.
महाराष्ट्र नवनिर्माण सेनेचे अध्यक्ष राजसाहेब ठाकरे यांनी मशिदींवरील भोंगे उतरविण्याचा अल्टिमेटम दिला होता. हे भोंगे उतरवले गेले नाही तर महाराष्ट्र नवनिर्माण सेनेच्या सैनिकांनी ४ मे रोजी राज्यभर मशिदींपासून हनुमान मंदिरांमध्ये दुप्पट आवाजाने भोंगे लावून हनुमान चालीसा म्हणावी, असा आदेश मनसेचे अध्यक्ष राजसाहेब ठाकरे यांनी दिले होते. त्यानुसार नंदुरबार जिल्हा महाराष्ट्र नवनिर्माण सेनेच्या वतीने नंदुरबार शहरातील धुळे रस्त्यावरील हिंदू एकता मित्र मंडळाच्या हनुमान मंदिरात सकाळी ११ वाजता एकत्र येऊन मनसेच्या कार्यकर्त्यांनी लाऊडस्पीकर लावत हनुमान चालीसा म्हटली. याप्रसंगी मनसेचे नंदुरबार जिल्हाध्यक्ष विजय विश्वनाथ चौधरी, नंदुरबार तालुकाध्यक्ष राकेश माळी, विधानसभा क्षेत्र अध्यक्ष सुनील कोकणी, विद्यार्थी सेनेचे जिल्हाध्यक्ष प्रवीण जोशी, जिल्हा सचिव पवनकुमार गवळे, उपशहराध्यक्ष राम ठक्कर, बबन पाडवी, अनिल पेंढारकर, अशोक माळी, उमेश मदने यांच्यासह पदाधिकारी व कार्यकर्ते मोठ्या संख्येने उपस्थित होते. यावेळी मनसेचे जिल्हाध्यक्ष विजय चौधरी म्हणाले की, महाराष्ट्र नवनिर्माण सेनेचे अध्यक्ष राजसाहेब ठाकरे यांनी दिलेल्या आदेशानुसार हनुमान मंदिरामध्ये हनुमान चालीसा म्हणण्यात आली आहे. तसेच यापुढेही राजसाहेब ठाकरे यांनी दिलेल्या सूचनेनुसार स्वाक्षरी मोहीम राबविण्यात येईल. या मोहिमेत मनसेच्या कार्यकर्त्यांसह नागरिकांनी सहभागी व्हावे, असे आवाहन मनसे जिल्हाध्यक्ष विजय चौधरी यांनी केले.
