नंदुरबार l प्रतिनिधी
अंगठ्याची खोटी निशाणी ठेवून भावानेच भावाच्या बॅँक खात्यातून ३० हजार रुपयांची रक्कम काढत अपहार केल्याची घटना धडगाव येथील स्टेट बॅँक शाखेत घडली असून याप्रकरणी चौघा संशयितांविरुद्ध गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, धडगाव तालुक्यातील उमराणी बुद्रूकचा कोतवाली पाडा येथील शिवदास उग्रावण्या पावरा हा धडगाव येथील उपकोषागार कार्यालयात सन २०१९-२०मध्ये शिपाई पदावर कार्यरत होता. यावेळी त्याने त्याचा भाऊ रेल्या उग्रावण्या पावरा याच्या धडगाव येथील स्टेट बॅँक ऑफ इंडियाच्या बॅँक खात्यात अंगठ्याची खोटी निशाणी ठेवून ३० हजार रुपयांचा अपहार केला. याबाबत रेल्या पावरा यांनी बऱ्याचदा शिवदास पावरा यास सदरची रक्कम परत देण्याची मागणी केली. मात्र सदरची रक्कम परत दिली नाही. याउलट राजेंद्र शिवदास पावरा, रायसिंग शिवदास पावरा व मिनेश शिवदास पावरा या तिघांनी रेल्या पावरा यांना हाताबुक्यांनी मारहाण करुन शिवीगाळ केली. याप्रकरणी रेल्या पावरा यांच्या फिर्यादीवरुन चौघा पिता-पूत्रांविरुद्ध धडगाव पोलिस ठाण्यात भादंवि कलम ४०८, ४२०, ४६८, ४७१, ३४ प्रमाणे गुन्हा दाखल करण्यात आला आहे. पुढील तपास पोलिस उपनिरीक्षक डी.के.महाजन करीत आहेत.