नंदुरबार l प्रतिनिधी
एक तर्फी प्रेमातून धडगाव बसस्थानकात गळफास घेऊन आत्महत्या केलेल्या तरुणाची ओळख पटली असून सदरचा तरुण अर्जुन विरजी पाडवी रा. डनेल ता.अक्कलकुवा असून सदर तरुण विवाहित असल्याची माहिती परिवाराने दिली.
धडगाव पोलीस स्टेशन क्षेत्रांतर्गत बाजारपेठेतील बस स्थानक प्रवासी शेडमध्ये गळफास घेऊन आत्महत्या केलेल्या तरुणाचे रात्री उशिरा नाव व गाव निष्पन्न झाले असून सदर मयत तरुणाचे नाव अर्जुन विरजी पाडवी असून तो अक्कलकुवा तालुक्यातील नर्मदा काठावरील डनेल सुजवापाडा येथील रहिवासी असल्याची माहिती तपास पोलीस अंमलदार राजेंद्र जाधव यांनी दिली आहे.
आत्महत्या करण्यापूर्वी सदर तरूणाने फरशीवर खडूने प्रेम प्रकरणातून आत्महत्या करत असल्याच्या आशयाची नोट लिहिली होती. मात्र त्याच्या परिवाराने दिलेली माहिती थक्क करणारी आहे. अर्जुन विवाहित असून त्याची पत्नी व त्याला तीन मुले असल्याची माहिती अर्जुनच्या परिवाराने दिली आहे. अर्जुनने लिहिलेल्या नोटमध्ये मुलीचा उल्लेख केला होता. मात्र अर्जुनच्या परिवाराला या मुली बद्दल काहीही माहिती नसल्याचे त्यांनी सांगितले आहे.
रात्री उशिरा अर्जुनचे वडील, काका व गावचे सरपंच आणि नातेवाईकांना अर्जुनचा मृतदेह ताब्यात देण्यात आला आहे. गळफास घेतलेल्या ठिकाणी एका मुलीला उद्देशून प्रेम संबंधी मजकूर अर्जुनने एकतर्फी प्रेमातून लिहून आत्महत्या केल्याचा अंदाज व्यक्त करण्यात येत आहे याबाबत धडगाव पोलीस स्टेशनात आत्महत्येची नोंद करण्यात आली असून अधिक तपास धडगाव पोलीस करीत आहे.