नंदुरबार l प्रतिनिधी
छत्रपती शिवाजी महाराज यांची तिथीनुसार शिवजयंती साजरी करण्यासंदर्भात बैठकीत एकमताने चर्चा करण्यात आली. 20 मार्च रोजी पूर्वसंध्येला मोटर सायकल रॅली तर 21 मार्च रोजी छत्रपती शिवरायांची सवाद्य मिरवणूक काढण्यात येणार आहे. या मिरवणुकीत नंदुरबार शहरातील विविध व्यायाम शाळा व शिवप्रेमी मंडळ सहभागी होणार आहेत.
नंदुरबार शहरातील मोठा मारुती मंदिरात शिवजयंतीच्या पार्श्वभूमीवर व्यायाम शाळा व शिवप्रेमींची बैठक घेण्यात आली या बैठकीत शिवजयंती तिथीनुसार साजरी करण्यावर चर्चा होऊन सर्वानुमते शिवजयंती उत्सव समिती स्थापन करण्यात आली. तसेच शिवजयंतीच्या पूर्वसंध्येला 20 मार्च रोजी सायंकाळी चार वाजता नंदुरबार शहरातील ग्यारा मिल कंपाऊंडपासून मोटारसायकल रॅलीला सुरुवात होईल. ही रॅली संभाजीनगर व्यायामशाळा, सिंधी कॉलनी, मोदी ग्राउंड, करण चौफुली, गिरीविहार गेट, उड्डाणपूल मार्गे गांधी पुतळा, महाराष्ट्र व्यायामशाळा, सोनार खुंट, जळका बाजार, दादा गणपती, मोठा मारुती मंदिर आणि छत्रपती शिवाजी महाराज नाट्यमंदिरात समारोप होईल. तसेच दिनांक 21 मार्च रोजी शिवजयंतीनिमित्त सायंकाळी चार वाजता सवाद्य मिरवणूक काढण्यात येईल. ही मिरवणूक माळीवाडा येथून निघणार असून महाराष्ट्र बँक शाळा सोनार खुंट, जळका बाजार, दादा गणपती, मोठा मारुती मंदिर, छत्रपती शिवाजी महाराज नाट्यमंदिर, दीनदयाळ चौक मार्गे जुनी नगरपालिका चौकात असलेल्या छत्रपती शिवाजी महाराजांच्या पुतळ्याचे पूजन करून समारोप होईल. या शिवजयंती उत्सव समिती गठीत करण्यात आली असून समितीत केतन रघुवंशी, पंडित माळी, अर्जुन सुधाकर मराठे, संजय रगडे, नरेंद्र पाटील, वीरेंद्र अहिरे, सागर चौधरी, कुणाल सोनार, भुषण पाटील, युवराज राजपूत, खुशाल चौधरी यांचा समावेश आहे. या बैठकीला शिवसेनेचे जिल्हाप्रमुख विक्रांत मोरे यांच्यासह शहरातील विविध व्यायामशाळेचे अध्यक्ष, संघटनांचे प्रमुख व शिवप्रेमी उपस्थित होते.