नंदुरबार l प्रतिनिधी
भाजप शासीत केंद्रीय सरकारच्या अंमलबजावणी संचालनालय (ईडी) या केंद्रीय यंत्रणेला हाताशी धरुन महाराष्ट्र राज्यातील महाविकास आघाडीतील मंत्र्यांची बदनामी करुन अल्पसंख्यांक मंत्री नवाब मलिक यांना चुकीच्या पध्दतीने अटक केली आहे. या अटकेचा राष्ट्रवादी शहर युवक कॉंग्रेस पार्टीतर्फे तीव्र निषेध नोंदविण्यात आला आहे, तसे निवेदन राष्ट्रवादी शहर युवक कॉंग्रेस पार्टीचे शहराध्यक्ष लल्ला मराठे यांनी जिल्हाधिकारी श्रीमती मनिषा खत्री यांना दिले.
राष्ट्रवादी कॉंग्रेस पार्टीचे जिल्हाध्यक्ष डॉ.अभिजीत मोरे यांच्या मार्गदर्शनाखाली व राष्ट्रवादी कॉंग्रेस पार्टीचे युवानेते ॲड.राऊ दिलीपराव मोरे यांच्या सुचनेनुसार नंदुरबार शहर युवक कॉंग्रेस पार्टीतर्फे नवाब मलिक यांच्या अटकेचा निषेध करण्यात आला. निवेदनात पुढे म्हटले आहे की, भाजप शासीत केंद्रीय सरकार कडुन अंमलबजवणी संचालनालय या केंद्रीय यंत्रणे मार्फत महाराष्ट्र राज्यातील महाविकास आघाडीतील काही मंत्र्यांची सुडबुध्दीने व व्देषापोटी टार्गेट केले जात आहे. नवाब मलिक राज्याचे सन्माननीय मंत्री असुन त्यांच्यावर चुकीच्या पध्दतीने कार्यवाही करुन अटक केली आहे. अंमलबजावणी संचालनलायमध्ये काम करणारे अधिकारी यांना कायद्याचे भान नाही का? मंत्र्याना किंवा कोणालाही अटक करावयाची असेल तर कायदेशिर नोटीस दिली जाते, नंतर चौकशी करायची असते, याची पुर्तता न करता नवाब मलिक यांना अटक करण्यात आली. सदरची अटक ही बेकायदेशिररित्या असुन केंद्रात असलेले भाजप सरकारने ठरवुन केलेले आहे. सदर ही बाब राज्यातील व देशातील लोकशाहीला घातक असुन केंद्रीय भाजप सरकार तानाशाही, हुकूमशाही राबवत असुन केंद्रीय यंत्रणेचा वापर करुन राज्यातील महाविकास आघाडी सरकारातील मंत्र्यांना सुडबुध्दीने बदनाम करण्यासाठी त्यांच्यावर कार्यवाही करित आहे. देशात अनेक मोठ-मोठे उद्योगपती आपली संपत्ती चुकीच्या पध्दतीने कमवुन ठेवतात याचा तपास ईडी का करित नाही, नवाब मलिक साहेब हे राष्ट्रवादी कॉंग्रेसचे प्रवक्ते आहेत म्हणुन त्यांना अटक करण्यात आली का? हा देखील प्रश्न निर्माण होतो. तरी आम्ही आपणास विनंती पुर्वक निवेदन सादर करितो की, केंद्रीय शासीत भाजप सरकार देशातील लोकशाही संपवु पहात आहे हे सुडबुध्दीचे व व्देषाचे राजकारण आहे त्याचा आम्ही निषेध करित आहोत, असे निवेदनात म्हटले आहे. जिल्हाधिकार्यांना निवेदन देतेप्रसंगी यावेळी राष्ट्रवादी युवक कॉँग्रेस पार्टीचे शहराध्यक्ष लल्ला मराठे, राष्ट्रवादी विद्यार्थी जिल्हाध्यक्ष बबलू कदमबांडे, राष्ट्रवादी युवक कॉंग्रेसचे नंदुरबार तालुकाध्यक्ष सुरेश वळवी, शहर उपाध्यक्ष लाला बागवान, राजा ठाकरे, साजिद बागवान, दिनेश भिल, अरुण पाडवी, संजय कोळी आदी उपस्थित होते.
