नंदुरबार l प्रतिनिधी
एकात्मिक आदिवासी विकास प्रकल्प तळोदा अंतर्गत येणाऱ्या तळोदा, अक्कलकुवा व धडगाव या तीन तालुक्यातील अनुसूचित जमातीच्या विद्यार्थ्यांना 2022-2023 या शैक्षणिक वर्षांत आदर्श आश्रमशाळा, देवमोगरा ता. नवापूर या निवासी शाळेत सन 2022-23 या शैक्षणिक वर्षात इयत्ता पाचवीच्या वर्गात प्रवेशासाठी प्रवेश अर्ज वितरित करण्यात येत आहेत.
प्रवेश अर्ज एकात्मिक आदिवासी विकास प्रकल्प तळोदा, गट शिक्षणाधिकारी, गटसाधन केंद्र पंचायत समिती तळोदा, अक्कलकुवा व धडगांव या ठिकाणी सुट्टीचे दिवस वगळून कार्यालयीन वेळेत विनामुल्य मिळतील. परीपुर्ण भरलेले प्रवेश अर्ज 28 फेब्रुवारी 2022 पर्यंत एकात्मिक आदिवासी विकास प्रकल्प, तळोदा येथे शिक्षण शाखेत येथे स्विकारण्यात येतील त्यानंतर आलेले अर्ज स्विकारले जाणार नाहीत.
प्रवेश परीक्षेत बसणारे विद्यार्थी, विद्यार्थीनी हे सन 2021-2022 या शैक्षणिक वर्षात इयत्ता चौथीत शासकीय, अनुदानित किंवा जिल्हा परिषद शाळेत शिकणारा असावा. अर्जासोबत विद्यार्थ्यांचे बोनाफाईड प्रमाणपत्र, इयत्ता चौथीचे प्रथम सत्र परीक्षा गुणपत्रक, अनुसूचित जमातीचे प्रमाणपत्र, रहिवासी दाखला, विद्यार्थ्यांच्या पालकाचे वार्षिक उत्पन्न 1 लाख पेक्षा अधिक नसावे. सोबत आर्थिक वर्ष 2020-2021 चा उत्पन्नाचा दाखला अर्जा सोबत जोडावा. तरी जास्तीत जास्त पालकांनी प्रवेशाचा लाभ घ्यावा, असे आवाहन सहायक प्रकल्प अधिकारी (शिक्षण) यांनी एका प्रसिध्दीपत्रकान्वये केले आहे.
