नंदुरबार l प्रतिनिधी
शिर्वे ता.तळोदा गावाजवळ दुचाकींच्या समोरासमोर झालेल्या धडकेत दोघांना दुखापत झाली असून याप्रकरणी अज्ञात दुचाकी चालकाविरूद्ध तळोदा पोलीस ठाण्यात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, तळोदा तालुक्यातील सतोना येथील योगेश संजी वसावे हे पिंपरपाडा येथून सतोना गावाकडे दुचाकीने (क्र.एम.एच.१५ एआर ३०३६) जात होते. यावेळी एका दुचाकी चालकाने त्याच्या ताब्यातील दुचाकी रस्त्याच्या परिस्थितीकडे दुर्लक्ष करुन भरधाव वेगात शिर्वे गावाजवळ दुचाकीला समोरुन धडक दिल्याने अपघात घडला. घडलेल्या अपघातात योगेश वसावे व अज्ञात दुचाकी चालकासोबत असलेला दानियल गुलाबसिंग वसावे रा.शिर्वे ता.तळोदा या दोघांना दुखापत झाली. याप्रकरणी योगेश वसावे यांच्या फिर्यादीवरुन तळोदा पोलिस ठाण्यात अज्ञात दुचाकी चालकाविरोधात गुन्हा दाखल करण्यात आला आहे. याप्रकरणी पुढील तपास पोना.जयसिंग वसावे करीत आहेत.