नंदुरबार | प्रतिनिधी
शहादा-लोणखेडा बायपासवर फोरव्हीलर व मोटारसायकलची समोरासमोर झालेल्या धडकेत मोटरसायकलस्वार जागीच ठार तर ६ जण जखमी झाले. यातील एक जण गंभीर असल्याने त्याला जिल्हा रुग्णालयात दाखल करण्यात आले आहे.याप्रकरणी धडगाव तालुक्यातील सिंधिदिगर येथील चालकाविरुद्ध गुन्हा दाखल करण्यात आला आहे.
याबाबत पोलीस सूत्रांनी दिलेल्या माहितीनुसार,
शहादा लोणखेडा बायपास रस्त्यालगत असलेल्या पाटीदार मंगल कार्यालयासमोर दि.२६ जानेवारी रोजी दुपारी १ वाजेच्या सुमारास सिंधिदिगर येथील रहिवासी बोलेरो (क्र.एम.एच.३९ जे.३७९०) ने जात असतांना कळंबू येथील दोघे म्हसावद येथे लग्नासाठी दुचाकीने (क्र.एम.एच.३९, पी.८५५४ ) ने जात असताना बोलेरो व मोटारसायकलची समोरासमोर धडक झाली. या अपघातात दुचाकीस्वार अजय सुभाष मोरे (२५) रा. कळंबू ता. शहादा याचा जागीच मृत्यू झाला तर सागर सोमा सोनवणे रा.कळंबू ता. शहादा यांना गंभीर दुखापत झाली त्यांना पुढील उपचारासाठी जिल्हा रुग्णालयात दाखल करण्यात आले आहे. अपघात झाल्यानंतर बोलेरो गाडी तीनदा उलटली. त्यामुळे बोलेरो गाडीतील ५ जण जखमी झाले. जखमींमध्ये भार्या कहर्या नाईक, चिंडुबाई भार्या नाईक, कुसमटीबाई रेहमलसिंग पावरा, जाडया मोसा नाईक यांचा समावेश आहे. त्यांच्यावर म्हसावद ग्रामीण रुग्णालयात उपचार करण्यात आले. सागर सोमा सोनवणे रा.कळंबू ता.शहादा हा गंभीर असल्याने त्याला जिल्हा रुग्णालयात दाखल करण्यात आले. याबाबत नंदिनी श्रीराम पावरा हिने दिलेल्या फिर्यादीनुसार खुमानसिंग गेमाल नाईक रा. सिंदीदिगर ता. धडगाव जि.नंदुरबार याच्याविरुद्ध गुन्हा दाखल करण्यात आला आहे. पुढील तपास हेकॉ तारसिंग वळवी करीत आहेत.
