नंदुरबार l प्रतिनिधी
राज्यातील सर्व शाळा सोमवारपासून दि.२४ जानेवारी पासून सुरु करण्यास परवानगी देण्यात आल्याची माहिती राज्याच्या शिक्षणमंत्री वर्षा गायकवाड यांनी दिली आहे. पहिले ते बारावीचे वर्ग सुरु होणार आहे. कोरोनाचे नियमांचे पालन करुन शाळा सुरु करण्यात येणार आहे.नवोदय विद्यालय किंवा आश्रम शाळा सुरु करण्यासंदर्भात येत्या काही काळात निर्णय घेण्यात येणार आहे.
ज्या ठिकाणी रुग्णसंख्या कमी त्या ठिकाणी शाळा सुरु होणार असल्याचे शिक्षणमंत्री वर्षा गायकवाड यांनी सांगितले. तसेच शाळा सुरु करण्यासंदर्भातील अधिकार स्थानिक प्रशासनाकडे असणार आहे.
राज्यातील शाळा सुरु करण्यासाठी मुख्यमंत्र्यांनी समंती दिली असल्याचं वर्षा गायकवाड यांनी सांगितलं. वर्षा गायकवाड म्हणाल्या की, “सर्वच स्तरांतून शाळा सुरु करण्याच्या संदर्भात मागणी होत होती. तसेच, शाळा सुरु करण्यासंदर्भातील अधिकार स्थानिक स्तारावार देण्याची मागणी होत होती. अशातच आजच्या बैठकीत सोमवारपासून शाळा सुरु करण्याचा निर्णय घेण्यात आला आहे. तसेच, सोमवार पासुन शाळा सुरु करण्याची परवानगी मुख्यमंत्र्यांनी दिली आहे. त्यामुळे कोरोनाचे सर्व नियम पाळून शाळा सुरु करण्यात येणार आहेत.”
कोरोनाच्या वाढत्या संसर्गाच्या पार्श्वभूमीवर राज्य सरकारने राज्यातील सर्व शाळा १५ फेब्रुवारीपर्यंत बंद ठेवण्याचा निर्णय घेतला आहे. मात्र या निर्णयावरुन नाराजी आणि विरोध होत आहे. विद्यार्थी पालकांसह शिक्षकांनीही सरसकट शाळा बंद विरोधात सोशल मीडियावर मोहीम सुरू केली आहे. शाळा बंद करण्यापेक्षा नियोजन करून शाळा सुरू ठेवाव्या, अशी मागणी शिक्षकांकडून होत होती. त्यामुळे अखेरी गुरुवारी शाळा सुरु करण्याचा निर्णयास मान्यता देण्यात आली.
