नंदुरबार| प्रतिनिधी
नंदुरबार शहरातील एकाची वीज बिल न भरल्याने विद्युत पुरवठा खंडीत केला. याचा राग येवून बस चालकाने विद्युत वितरण कंपनीच्या कार्यालयातून येवून वीज वितरण कंपनीचा कर्मचार्याला मारहाण केल्याची घटना घडली आहे. तसेच कार्यालयातील टेबल खुर्च्याही फेकून दिल्याप्रकरणी एकाविरूध्द उपनगर पोलीस ठाण्यात गुन्हा दाखल करण्यात आला आहे.
याबाबत पोलीस सुत्रांनी दिलेल्या माहितीनुसार, नंदुरबार बस आगारातील चालक हेमंत रामदास मोहिते यांच्या म्हाडा कॉलनी येथील घराचे विद्युत बिल न भरल्याने वीज पुरवठा खंडीत करण्यात आला होता. याचा राग येवून हेमंत मोहिते यांनी विद्युत वितरण कंपनीचे इंदिरा संकुल कार्यालय क्रमांक तीन येथे जावून शेखर मुनाफ पिंजारी यांना शिवीगाळ करीत हाताबुक्यांनी मारहाण करीत शर्ट फाडला. यात शेखर पिंजारी यांच्या हाताच्या अंगठयाला किरकोळ दुखापत झाली. तसेच कार्यालयातील दस्तावेज टेबल फेकत शासकीय कामात अडथळा आणला म्हणून शेखर इम्रान मुनाफ पिंजारी रा.एम.के.नगर (नंदुरबार) यांच्या फिर्यादीवरून उपगर पोलीस ठाण्यात हेमंत रामदास मोहिते रा.म्हाडा कॉलनी (नंदुरबार) यांच्याविरूध्द भादंवि कलम ३५३,३३२, ५०४, ४२७ प्रमाणे गुन्हा दाखल करण्यात आला आहे.या प्रकरणी पुढील तपास पोसई देविदास सोनवणे करीत आहेत.
