तळोदा येथे केळी विक्रेत्याची सात लाखात फसवणूक, हरियाणाच्या दोघांविरूद्ध गुन्हा दाखल

नंदुरबार l प्रतिनिधी
तळोदा येथून खरेदी केलेल्या केळीची रक्कम न देता सुमारे सात लाख रुपयात फसवणूक केल्याप्रमाणे हरियाणा येथील दोघांविरूद्ध तळोदा पोलीस ठाण्यात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, तळोदा येथील शैलेश सुधाकर महाजन यांच्या जय किसान फ्रुट सप्लायर्सकडून राकेश टाक व संजय टाक दोघे रा.वर्मा केला स्टोअर्स दुकान नई सब्जी मंडी, शिरसा हरियाणा यांनी वेळोवेळी केळी खरेदी बील अदा करुन शैलेश महाजन यांचा विश्वास संपादन केला. तसेच दि.१६ मे २०२० रोजी दोघांनी शैलेश महाजन यांच्याकडून खरेदी केलेल्या केळीचे ७ लाख १० हजार ४६७ रुपये अद्यापपावेतो न देता फसवणूक केली. याबाबत शैलेश महाजन यांच्या फिर्यादीवरुन तळोदा पोलिस ठाण्यात राकेश टाक व संजय टाक यांच्याविरोधात भादंवि कलम ४२०, ३४ प्रमाणे गुन्हा दाखल करण्यात आला आहे.याप्रकरणी पुढील तपास सहाय्यक पोलिस निरीक्षक अविनाश केदार करीत आहेत.