नंदूरबार l प्रतिनिधी
नंदुरबार येथील कल्याणी गॅस एजन्सीची अज्ञात व्यक्तीने ऑनलाईन फसवणुक करून चार लाख २० हजार रुपयांचा गंडा घातल्याची घटना घडली आहे. याप्रकरणी अज्ञात व्यक्तीविरुद्ध नंदूरबार पोलीस ठाण्यात फसवणुकीचा गुन्हा दाखल करण्यात आला आहे.
याबाबत पोलीस सूत्रांनी दिलेल्या माहितीनुसार, नंदूरबार शहरातील कल्याणी गॅस एजन्सीचे दीपक सुरेश शिंदे हे संगणकावर एसबीआय योनो या ॲपवर ऑनलाईन पैशांचा भरणा करीत होते. त्यासाठी रजिस्टर असलेल्या मोबाईलवर ओटीपी आला नाही. त्यामुळे त्यांनी गुगलवर एसबीआयचा कस्टमर केअरचा नंबर शोधला. त्यांना एक मोबाईल नंबर मिळाला. त्यावर संपर्क केला असता संबंधिताने एनी डेस्क हे ॲप मोबाईलवर डाऊनलोड करण्यास सांगितले. त्यानंतर पुन्हा दुसऱ्या क्रमांकावरून शिंदे यांना फोन आला त्यानंतर कल्याणी गॅस एजन्सीच्या बँक खात्यातून दोन लाख रुपयांचे दोन वेळा व पाच हजार रुपयांचे चार वेळा
असे एकूण चार लाख २० हजार रुपये चोरट्याने ऑनलाईन काढून घेतले.याप्रकरणी दीपक शिंदे यांच्या फिर्यादीवरून अज्ञात व्यक्तीविरुद्ध फसवणुकीचा गुन्हा दाखल करण्यात आला आहे.याप्रकरणी पुढील तपास पोलीस निरीक्षक किरणकुमार खेडकर करीत आहे.
