नवापूर | प्रतिनिधी
नवापूर ते नंदुरबार रेल्वे रुळ दुरुस्तीच्या कामासाठी आज दि.२७ ते ३१ डिसेंबरपर्यंत रेल्वे क्रॉसिंग गेट बंद करण्यात आले आहे.
नवापूरपासून नंदुरबारपर्यंत असलेल्या लोहमार्गाच्या रेल्वे रुळ दुरुस्तीच्या कामाला आज दि.२७ डिसेंबरपासून सुरुवात करण्यात आली सदर रेल्वे रूळ दुरुस्तीचे काम ३१ डिसेंबरपर्यंत सुरू राहणार आहे. या दुरुस्तीच्या कामासाठी नवापूर ते नंदुरबार मार्गावरील रेल्वे क्रॉसिंग गेट नंबर ६९ तसेच रेल्वे लेवल क्रॉसिंग गेट नंबर ७४ बंद करण्यात आले आहे. त्यामुळे या मार्गावरील पर्यायी वाहतूक वळविण्यात आली आहे. धुळे व गुजरात राज्यात जाण्यासाठी धुळे, साक्री, पिंपळनेर ते नवापूर या मार्गाने वाहतूक वळविण्यात आली आहे. नंदुरबारकडे जाण्यासाठी नवापूर उच्छल धानोरा मार्गे वाहतूक वळविण्यात आली आहे. सदर रेल्वे रूळ दुरुस्तीचे काम सुरू असलेल्या रेल्वेगेट जवळ नवापूर पोलीस पथक बंदोबस्तासाठी तैनात करण्यात आले आहे. नवीन येणार्या वाहनधारकांना पर्यायी मार्गांची सुचना देण्यात येत आहेत. याप्रसंगी नवापूर पोलीस स्टेशनचे पोलीस निरीक्षक बाळासाहेब भापकर यांच्या मार्गदर्शनाखाली दोघा रेल्वे क्रॉसिंग गेटवर पोलीस बंदोबस्त ठेवण्यात आला आहे.
