सारंगखेडा l प्रतिनिधी
‘ सर्वज्ञ श्री दत्तात्रेय भगवान की जय ‘ च्या घोषणेने आज पहिल्या दिवशी दत्त प्रभूंच्या दर्शनाला पहाटेपासूनच स्थानिक व परप्रांतीय भक्तांची रांग लागली . होती .पहाटे तीनला घंटानादात दत्त प्रभूंच्या मूर्तीला विधीवत स्थान करण्यात आले . त्यानंतर दर्शनासाठी मंदिर खुले करण्यात आले . यावेळी कोरोना नियमांचे पालन करण्यात येत होते .
मार्गर्षिश पौर्णिमेच्या दत्त अवतार दिनानिमित्त दत्त प्रभुंना आज हजारो भाविकांच्या उपस्थितीत नयनांनी साठविलेले अभिषेकांनंतरचे दत्तांचे सजविलेले आकर्षण रुप, फुलांची पुष्पवृष्टी आणि दत्त प्रभु की जय चा जयघोषाने अवघी सारंगखेडा दत्त नगरी भक्तीरसात न्हाऊन निघाली . दत्त दर्शनासाठी आलेल्या भाविकांच्या भक्तीने दत्त सोहळा आज सजला होता . सायंकाळ पर्यंत भाविकांची गर्दी वाढली .
कोरोनाच्या साथीमुळे प्रशासनाने यात्रा भरविण्यास मनाई आदेश जारी केले होते . कायदा सुव्यवस्था राखण्यासाठी पोलीस निरिक्षक राजेश शिरसाठ यांच्या नेतृत्वाखाली यात्रा परिसर व अश्व बाजारातील प्रमुख रस्त्यावर पोलीसांचे संचलन करण्यात आले होते . यात्रा व मुख्य रस्त्यावर बॅरीगेट लावण्यात आले आहेत .ओमिक्रॉन ची परिस्थिती घेऊन लस घेतलेल्या व मास्क लावलेल्या भाविकांना दर्शना साठी सोडण्यात येत होते .
दीडशे तुलांचे नवस
नवसाला पावणाऱ्या दत्त प्रभुंचा नवस फेडण्यासाठी पहाटेपासूनच गर्दी होती . दुपारी दोन पर्यंत दीडशेहून अधिक तुलाचे नवस फेडले होते . मुला . मुलींचे लग्न व्हावे , घर बांधणे , कोरोना मुक्त झालेले , अपघातातून जीव वाचणे , आजारपणातुन बरे होणे , मुल होणे , निवडणुकीत विजयी होणे आदींचे नवस फेडण्यासाठी साखर , गुळ , केळी , पेढे , चिल्लर आदींची तुला करून नवस फेडले जात होते .
