नंदूरबार l प्रतिनिधी
धडगाव-वडफळ्या-रोषमाळ बु. नगरपंचायतीच्या निवडणुकीसाठी आज उमेदवारी अर्ज माघारीच्या शेवटच्या दिवशी तीन जणांची माघार घेतली. त्यामुळे १७ जागांसाठी आता ४८ उमेदवार निवडणूक रिंगणात आहेत.
धडगाव-रोषमाळ-वडफळ्या नगरपंचायतीचा निवडणूक कार्यक्रम घोषित झाला आहे. त्यानुसार दि.१ डिसेंबर पासून नामांकन अर्ज दाखल करण्यास सुरुवात झाली होती. नगरपंचायतीच्या निवडणूक कार्यक्रमानुसार पाच दिवसांपर्यंत एकही अर्ज दाखल झाला नाही. दि.६ डिसेंबर रोजी ९ नामनिर्देशन पत्र दाखल झाले होते.तर शेवटच्या दिवशी ६१ जणांनी नामांकन दाखल केले.त्यामुळे १७ जागांसाठी ७० उमेदवारांनी नामांकन दाखल झाले होते. छाननीत १९ अर्ज अवैध ठरले होते. त्यामुळे ५१ उमेदवार निवडणुकीच्या रिंगणात होते. आज उमेदवारी अर्ज माघारीच्या शेवटच्या दिवशी प्रभाग क्रमांक ६ मधील भाजपाचे विकास रमेश पावरा, प्रभाग क्रमांक १० मधून राष्ट्रवादीच्या नितू अशोक पाडवी, प्रभाग १४ मधून अपक्ष प्रमिला प्रविण पावरा यांनी माघार घेतली. त्यामुळे आता निवडणूक रिंगणात ४८ उमेदवार आहेत. दि.२१ डिसेंबरला मतदान तर दि.२२ डिसेंबर रोजी मतमोजणी होणार आहे. यात शिवसेनतर्फे १७, कॉग्रेसचे १७, भाजपाचे ११ तर राष्ट्रवादीचा एक तर दोन अपक्ष उमेदवार निवडणुकीच्या रिंगणात आहेत.
