नंदुरबार l प्रतिनिधी
शहरातील अमृत चौक रामदूत हनुमान मंदिराजवळील उघड्या ड्रेनेजमुळे अनेक नागरिक जायबंदी होऊन दुखापत झाल्याची घटना घडली होती. याबाबत नगरपालिका प्रशासनाकडे तक्रार करण्यात आली होती. अखेर नगरपालिका प्रशासनाने दखल घेऊन तत्परतेने ‘त्या’ ठिकाणी नव्याने ड्रेनेज झाकण बसविले. याबद्दल नागरिकांनी समाधान व्यक्त केले आहे.
नंदूरबार शहरातील अमृत चौक भागातील वर्दळीच्या रस्त्यावर असलेल्या उघड्या ड्रेनेजमुळे नागरिकांचे अपघाताचे प्रमाण वाढले होते. याबाबत नगरपालिकेकडे वेळोवेळी पाठपुरावा करण्यात आला. त्यानूसार नगरपालिकेच्या आरोग्य व बांधकाम विभागाने तत्परतेने दखल घेऊन नव्याने ड्रेनेज झाकण बसवून दिले. यामुळे परिसरातील नागरिकांनी समाधान व्यक्त केले असून या भागातील रहिवासी राजेंद्र शिंत्रे आणि रामदास जाधव यांनी नगरपालिका मुख्याधिकारीसह प्रशासन, आरोग्य विभाग, बांधकाम विभाग, प्रभागातील नगरसेवक आणि संबंधित कर्मचाऱ्यांचे आभार मानले आहेत.
