नंदुरबार l प्रतिनिधी
शहरातील माळीवाडा परिसरात चोरट्याने पुन्हा घरफोडी करीत रोकडसह दागिने असा सुमारे दीड लाखाचा ऐवज लंपास केला.याप्रकरणी नंदुरबार शहर पोलीस ठाण्यात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, नंदुरबार येथील उमाकांत शामराव बागुल यांचे माळीवाडा धानोरा नाक्याजवळील शिवाजी नगरात घर आहे. सदर घराच्या खिडकीचा गज तोडून चोरट्याने आत प्रवेश केला. घरात असलेली १ लाख २७ हजार रुपयांची रोकड व २९ हजार ५०० रुपये किंमतीचे सोने-चांदीचे दागिने असा एकूण १ लाख ५६ हजार ५०० रुपये किंमतीचा ऐवज लंपास केला. याबाबत उमाकांत बागुल यांच्या फिर्यादीवरुन नंदुरबार शहर पोलिस ठाण्यात अज्ञाताविरोधात भादंवि कलम ४५४, ४५७, ३८० प्रमाणे गुन्हा दाखल करण्यात आला आहे. पुढील तपास पोलिस उपनिरीक्षक एस.बी.आहेर करीत आहेत.
