नंदुरबार l प्रतिनिधी
धुळे व नंदुरबार जिल्हा मध्यवर्ती सहकारी बँकेसाठी आज दि.२१ रविवारी रोजी सकाळी ८ ते दुपारी ४ या वेळेत मतदान होईल . नंदुरबार जिल्ह्यातील सहा ठिकाणी ८ केंद्रांत मतदान होईल . बँकेच्या नऊ गटातून १० जागांसाठी २० उमेदवार रिंगणात आहेत . मतदानासाठी प्रशासनाची तयारी पूर्ण झाली असून , मतदान साहित्यासह कर्मचारी सायंकाळपर्यंत मतदान केंद्रात पोहोचले .
धुळे व नंदुरबार जिल्हा मध्यवर्ती सहकारी बँकेच्या १७ पैकी ७ जागा बिनविरोध झाल्या आहेत . सर्वसमावेशक शेतकरी विकास पॅनल व विरोधकांमध्ये समोरासमोर लढत होणार आहे . नंदुरबार वि . का . सोसायटी मतदारसंघात माजी आमदार चंद्रकांत बटेसिंग रघुवंशी आणि पावबा माधवराव धनगर यांच्यात लढत आहे . या गटात ६९ मतदार मतदान करतील . अक्राणी महल वि . का . सोसायटीच्या जागेसाठी संदीप मोहन वळवी व विलास पुनाजी पाडवी यांच्यात लढत असून १६ मतदार आहे . नवापूर वि . का . सोसायटीच्या जागेसाठी अभिमन फुलसिंग वसावे विरुद्ध अमरसिंग हुरजी गावित यांच्यात लढत होत असून , १७ मतदार आहेत . विमुक्त जाती , भटक्या जमाती किंवा विशेष मागासवर्गीय जागेसाठी दर्यावगीर दौलतगीर महंत विरुद्ध सुरेश फकिरा शिंत्रे यांच्यात लढत आहे . सर्व मतदार संघातून ९८३ मतदार मतदान करतील .कृषी पणन संस्था व शेतीमाल प्रक्रिया संस्थेच्या जागेसाठी शेतकरी विकास पॅनलतर्फे विद्यमान चेअरमन राजवर्धन कदमबांडे विरुद्ध अंकुश विक्रम पाटील यांच्यात लढत आहे . या गटात १४४ मतदार आहेत .या निवडणुकीसाठी नंदुरबार महात्मा गांधी विद्यामंदिर , नगरपालिका शाळा नंबर १५ ( २ केंद्र ) , शहादा म्युनिसिपल आर्टस , कॉमर्स व सायन्स कॉलेज ( २ केंद्र ) , नवापूर आदर्श मराठी शाळा ( १ केंद्र ) , तळोदा नगरपालिका शाळा नंबर ६ ( १ केंद्र ) , अक्कलकुवा जिल्हा परिषद कन्या शाळा नंबर ३ ( १ केंद्र ) , अक्राणीमहल ( धडगाव ) कै . पी . सी . पराडके माध्यमिक कन्या शाळा ( १ केंद्र ) अशा ६ ठिकाणी ८ मतदान केंद्रांवर मतदानाची प्रक्रिया पार पडेल .सोमवार दि.२२ नोव्हेंबर रोजी धुळे येथील वाडीभोकर रस्त्यावरील पारस मंगल कार्यालयात मतमोजणी होणार आहे.
