शहादा l प्रतिनिधी
गेल्या १६ दिवसांपासून राज्यात एस . टी . कर्मचाऱ्यांचा संप सुरू असताना काल शहादा आगारातून धडगावसाठी पोलिसांच्या संरक्षणात पाच प्रवाशांसह पहिली बस रवाना करण्यात आली होती .मात्र धडगाव तालुक्यातील काकडदा गावाजवळ अचानक बस चालवत असताना चालकाला हृदय विकाराचा त्रास होवू लागल्याने त्यांनी बस रस्त्याच्या कडेला उभी केली . बसवाहक व प्रवाशांनी त्यांना रुग्णालयात दाखल केले असून त्यांची प्रकृती स्थिर आहे .
याबाबत अधिक माहिती अशी की, राज्यात गेल्या
१६ दिवसांपासून एस . टी . चे शासकीय सेवेत विलीनीकरणासाठी संप सुरू आहे.त्यामुळे एक ही बस आगाराच्या बाहेर पडली नाही, काल दि . १ ९ रोजी सकाळी साडेअकरा वाजता शहादा बसस्थानकातून शहादा धडगाव ही बस ( क्र . एमएच २० बीएल ० ९ १६ ) शहादा पोलिसांच्या संरक्षणात चालक अशोक कोळी व वाहक रवींद्र शिरसाठ यांच्यासह बसमध्ये पाच प्रवासी धडगावसाठी रवाना झाले होते . या बसला शहादा पोलिसांनी म्हसावदपर्यंत संरक्षण दिले . तेथून पुढे म्हसावद पोलिसांनी फत्तेपूरपर्यंत संरक्षण दिले होते . त्यानंतर ही बस प्रवाशांना घेऊन धडगावकडे रवाना झाली होती . मात्र रस्त्यातच अतिदुर्गम भाग असलेल्या सातपुडा पर्वतरांगेतील काकडदा गावाजवळ चालक अशोक कोळी यांना छातीत कळा आल्याने त्यांनी प्रसंगावधान राखून बस उभी करत वाहक व प्रवाशांना त्यांना होणाऱ्या त्रासाची जाणीव करून दिली . त्यांनी तत्काळ काकडदा रुग्णालयात त्यांना प्राथमिक उपचारासाठी दाखल करीत शहादा येथील एसटी महामंडळाच्या अधिकाऱ्यांना घटनेची माहिती दिली . घटनास्थळी आगारप्रमुख वाय . एस . लिंगायत यांनी आपल्या कर्मचाऱ्यांसह घटनास्थळी धाव घेत श्री . कोळी यांना शहादा येथील खाजगी रुग्णालयात दाखल केल्याने मोठा अनर्थ टळला आहे . या संपूर्ण घटनेवरून संप सोडून पुन्हा सेवेत हजर होणाऱ्या कर्मचाऱ्यांची मानसिकता स्थिर नसल्याचे स्पष्ट होत आहे . सध्या संपात सामील न होणाऱ्या कर्मचाऱ्यांवर मोठा दबाव निर्माण झाला आहे . त्या कर्मचाऱ्यांची मानसिकता खचल्याने कालच्या घटनेवरून दिसून आल्याचे बोलले जात आहे .
संपकरी कर्मचाऱ्यांमध्ये अशोक कोळी हे कालपर्यंत सहभागी होते . मात्र पन्नाशीच्या वर वय असल्याने नोकरी जाण्याच्या भीतीपोटी त्यांनी संपातून माघार घेत कामावर येण्याचा निर्णय घेतला होता.
