तिनसमाळ येथे स्थानिक नागरिकांच्या मदतीने जोहार आदिवासी संग्रहालयाची निर्मिती

धडगाव l प्रतिनिधी
सातपुड्यातील तिनसमाळ येथे स्थानिक नागरिकांच्या मदतीने जोहार आदिवासी संग्रहालयाची निर्मिती करण्यात आली.
सातपुडा पर्वत रांगेतील तीन राज्यांच्या सीमेवर असलेल्या तिनसमाळ येथे जोहार फाउंडेशनच्या माध्यमातून आदिवासी पारंपारिक वस्तुसंग्रहालयाचे उद्घाटन मान्यवरांच्या उपस्थितीत संपन्न झाले. या गावातील तरुण लक्ष्मण पावरा यांच्या पुढाकाराने स्थानिक नागरिकांच्या मदतीने आदिवासी संग्रहालयाची निर्मिती करण्यात आली आहे. आदिवासी साहित्य, संस्कृती पुढच्या पिढीसाठी ऐतिहासिक ठरावी या उद्देशाने या संग्रहालयाची निर्मिती करण्यात आली आहे. आदिवासी ढोल वाजवत जंगलात राहणाऱ्या आदिवासींचा पेहराव करून गावातून नाचत गाजत रॅली काढण्यात आली. त्यानंतर मान्यवरांच्या उपस्थितीत आदिवासी परंपरेनुसार गिरहणमाता, याहा मोगी यांची विधीवत पूजा करून जोहार आदिवासी संग्रहालयाचा शुभारंभ करण्यात आला. प्रथम नाणी संग्रहालयाचे प्रदर्शन संदीप पावरा यांच्या हस्ते करण्यात आले. या संग्रहालयात विविध पारंपारिक आदिवासी साहित्यिक पुस्तके, वस्तू, भांडी, वनौषधी, व इतर माहिती संग्रहित केली जाणार आहे. या संग्रहालयाचा आणखी विकास व्हावा यासाठी ग्रामपंचायत स्तरावरून व महाराष्ट्र शासनाकडून मदत मिळावी जेणेकरून सातपुडा पर्वतरांगांनी वेढलेलं व नर्मदा नदीच्या काठावर असलेल्या ऐतिहासिक व थंड हवेचे ठिकाण म्हणून पर्यटनस्थळ असलेल्या तिनसमाळ गावाची जागतिक स्तरावर ओळख निर्माण व्हावी यासाठी विशेष प्रयत्न करणे गरजेचे असल्याचे मान्यवरांनी सांगितले. नैसर्गिक संपदा लाभलेल्या तिनसमाळ गावकऱ्यांच्या माध्यमातून उभारलेल्या संग्रहालयाच्या उद्घाटन प्रसंगी कार्यक्रमाचे अध्यक्ष मोगरा बाबा, प्रमुख पाहुणे आदिवासी साहित्यिक वाहरू दादा सोनवणे, युवा कवी संतोष पावरा, इंजि. झेलसिंग पावरा, जिल्हा परिषद सदस्य सी. के. पाडवी, नामदेव पटले, सिताराम पावरा, पंचायत समिती उपसभापती भाईदास अत्रे, सुरेश मोरे, आदिवासी जनजागृतीचे प्रमुख अर्जुन पावरा , ॲड. कैलास वसावे आदी मान्यवरांसह गावकरी व पाहुणे मोठ्या संख्येने उपस्थित होते.