नंदुरबार l प्रतिनिधी
सेवानिवृत्त पोलीस अधिकारी व अंमलदार यांच्या विविध मागण्या प्रलंबित असल्याने सेवानिवृत्त पोलीस अधिकारी व अंमलदार कल्याणकारी सेवाभावी संघटनेच्या पदाधिकारी शिष्टमंडळाने नुतन पोलीस अधिक्षक पी.आर.पाटील यांची सदिच्छा भेट घेवुन चर्चा केली. सदरच्या अडचणी व मागण्या त्वरीत सोडविण्याबाबत पोलीस अधिक्षक पी.आर.पाटील यांनी शिष्टमंडळास आश्वासन दिले.
नंदुरबार जिल्हा सेवानिवृत्त पोलीस अधिकारी व अंमलदार कल्याणकारी सेवाभावी संघटनेकडुन सेवानिवृत्त पोलीस अधिकारी व अंमलदार यांना निवृत्ती योजनेचा लाभ मिळावा आणि अडचणी सोडविण्यासाठी पाठपुरावा केला जात आहे. गेल्या दोन वर्षांपासुन मागण्यांसाठी पाठपुरावा होत असुन त्या प्रलंबित राहत आहे. म्हणुन नंदुरबार जिल्हा सेवानिवृत्त पोलीस अधिकारी कल्याणकारी संघटनेच्या पदाधिकारी शिष्टमंडळाने नंदुरबारचे नुतन पोलीस अधिक्षक पी.आर.पाटील यांची भेट घेतली. यावेळी पोलीस अधिक्षक पी.आर.पाटील व पोलीस उपअधिक्षक विश्वास वळवी यांचा संघटनेकडुन सत्कार करण्यात आला. सेवानिवृत्त पोलीस अधिकारी, अंमलदार यांच्या विविध अडचणी आणि मागण्यांसंदर्भात चर्चा करण्यात आली. सेवानिवृत्त वेतन, ग्रज्युईटी, पेन्शन विक्री, रजा रोखीकरण आदी योजनांच्या लाभापासुन नंदुरबार जिल्ह्यातील सेवानिवृत्त पोलीस कर्मचारी वंचित असल्याची माहिती संंघटनेने दिली. त्यावर पोलीस अधिक्षक पी.आर.पाटील यांनी चर्चा करुन सेवानिवृत्तांच्या मागण्या व अडचणी त्वरीत सोडविण्यात येतील, असे आश्वासन दिले. याप्रसंगी सेवानिवृत्त पोलीस अधिकारी व अंमलदार कल्याणकारी सेवाभावी संघटनेचे नंदुरबार जिल्हाध्यक्ष मोतीलाल ठाकुर, उपाध्यक्ष रमेश खवळे, सचिव जगन्नाथ जगदाळे, संचालक रऊफ शाह, प्रदिप पाटील, साहेबराव सैंदाणे, सदस्य प्रकाश राणे, सदाशिव शिरसाळे, केसरसिंग क्षत्रिय, काशिनाथ जाधव, संभाजी सोनवणे, सरीचंद पवार, प्रभाकर बागल, विनोदसिंग राजपुत आदी उपस्थित होते.
