मोदरापाड्यात २९ लाखांचा गांजा हस्तगत
नंदुरबार l प्रतिनिधी-
ज्वारीच्या पिकाआड गांजाची लागवड करून त्याची जोपासना केली जात असल्याचा प्रकार अक्कलकुवा तालुक्यातील मोदरापाडा येथे उघडकीस आला आहे. स्थानिक गुन्हे शाखेच्या पथकाने सोमवारी (दि. १२) छापा टाकून तब्बल **२८ लाख ५८ हजार ३०० रुपये किमतीची ५८ किलो २४६ ग्रॅम वजनाची गांजाची झाडे जप्त केली. या प्रकरणी सोत्या काल्या तडवी (वय ६०, रा. मोदरापाडा, हुणाखांब, ता. अक्कलकुवा) याला ताब्यात घेण्यात आले असून, त्याच्याविरुद्ध मोलगी पोलीस ठाण्यात अमली पदार्थविरोधी कायद्यान्वये गुन्हा दाखल करण्यात आला आहे.
आगामी सण-उत्सवांच्या पार्श्वभूमीवर अवैध दारूची वाहतूक व साठा, बेकायदेशीर शस्त्रे आणि अमली पदार्थांची लागवड याविरोधात कठोर कारवाई करण्याच्या सूचना जिल्हा पोलीस अधीक्षक अश्विनी सानप यांनी सर्व पोलीस ठाण्यांच्या प्रभारी अधिकाऱ्यांना दिल्या आहेत. त्यानुसार स्थानिक गुन्हे शाखेचे पोलीस निरीक्षक अभिषेक पाटील यांना १२ ऑक्टोबर रोजी गोपनीय माहिती मिळाली. मोलगी पोलीस ठाण्याच्या हद्दीतील हुणाखांब गावाच्या शिवारात, मोदरापाडा येथे एका इसमाने स्वतःच्या ज्वारीच्या शेतात बेकायदेशीररीत्या गांजाची लागवड केल्याची माहिती त्यांना मिळाली.
या माहितीच्या आधारे पोलीस निरीक्षक अभिषेक पाटील यांनी पथक तयार करून कारवाईचे आदेश दिले. पथकाने संबंधित शेताची पाहणी केली असता तेथे गांजाची झाडे आढळून आली. पोलिसांनी या झाडांचे वजन व मूल्य निश्चित करून २८ लाख ५८ हजार ३०० रुपयांचा मुद्देमाल जप्त केला. ज्वारीच्या पिकासोबत गांजाची लागवड करून त्याची जोपासना केल्याचा आरोप सोत्या काल्या तडवी याच्यावर ठेवण्यात आला आहे.
या प्रकरणी मोलगी पोलीस ठाण्यात अमली पदार्थ आणि मनःप्रभावी पदार्थ अधिनियम, १९८५ (एनडीपीएस कायदा) अन्वये गुन्हा दाखल करण्यात आला आहे. जप्त गांजाचे प्रमाण आणि त्याची किंमत लक्षात घेता, दुर्गम भागातील शेतशिवारात सुरू असलेल्या अमली पदार्थांच्या बेकायदेशीर लागवडीचा मुद्दा पुन्हा ऐरणीवर आला आहे.
ही कारवाई पोलीस अधीक्षक अश्विनी सानप आणि अपर पोलीस अधीक्षक आशित कांबळे यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक अभिषेक पाटील, पोलीस उपनिरीक्षक मुकेश पवार, विकास गुंजाळ, महेश निकम, पोलीस हवालदार दिनेश चित्ते, स्वप्नील गोसावी, मुकेश तावडे, जितेंद्र पाडवी तसेच पोलीस अंमलदार अनिल नागरगोजे, अभय राजपूत, हेमंत बारी, विनोद पाटील आणि रवींद्र अहिरे यांच्या पथकाने या कारवाईत सहभाग घेतला.
