नंदुरबार l प्रतिनिधी
‘जय श्रीराम’चा जयघोष, ढोल-ताशांचा गजरात आणि भक्तीमय वातावरणात नंदुरबार शहरात रघुवंशी समाजाच्या वतीने रामनवमीनिमित्त भव्य शोभायात्रा काढण्यात आली. यावेळी तरुणांनी ढोल-ताशांच्या तालावर आणि डीजेवरील श्रीरामांच्या गीतांवर नृत्य करत जल्लोष साजरा केला.
दरवर्षीप्रमाणे यंदाही रघुवंशी समाजाच्या वतीने गुरुवारी सकाळी ११ वाजता या शोभायात्रेचे आयोजन करण्यात आले होते. शोभायात्रेच्या प्रारंभी शिवसेनेचे संपर्कप्रमुख आमदार चंद्रकांत रघुवंशी आणि नगराध्यक्षा सौ. रत्ना रघुवंशी यांच्या हस्ते प्रभू श्रीरामाच्या प्रतिमेचे पूजन व आरती करण्यात आली.
*असा होता शोभायात्रेचा मार्ग*
परदेशीपुरा येथील श्रीराम मंदिरापासून या शोभायात्रेला सुरुवात झाली. तेथून आमदार कार्यालय, जुनी नगरपालिका चौक, परदेशीपुरा, अंधारे चौक या मार्गाने मार्गक्रमण करत शोभायात्रा पुन्हा श्रीराम मंदिरात विसर्जित झाली. या संपूर्ण मार्गावर रघुवंशी समाजाचे बांधव आणि भाविक मोठ्या संख्येने उपस्थित होते.
*श्रीराम जन्मोत्सव*
दुपारी ठीक १२ वाजता श्रीराम मंदिरात प्रभू श्रीरामाचा जन्मोत्सव मोठ्या थाटात साजरा करण्यात आला. जन्मोत्सवाच्या वेळी ‘सियावर रामचंद्र की जय’च्या घोषणांनी मंदिर परिसर दुमदुमून गेला होता. दर्शनासाठी भाविकांनी सकाळपासूनच मंदिरात मोठी गर्दी केली होती.
