शहादा येथे तृतीयपंथियांसाठी जाणिव जागृती कार्यशाळा

नंदुरबार l प्रतिनिधी-

राज्यातील तृतीयपंथीय घटकांतील व्यक्तींची सर्वांगीण उन्नती व्हावी आणि त्यांना समाजाच्या मुख्य प्रवाहात आणता यावे, या उद्देशाने पंचायत समिती, शहादा येथे विशेष जाणिव जागृती कार्यशाळेचे आयोजन करण्यात आले होते. सहाय्यक आयुक्त समाज कल्याण, नंदुरबार व पंचायत समिती, शहादा यांच्या संयुक्त विद्यमाने ही कार्यशाळा पार पडली, अशी माहिती समाज कल्याण सहाय्यक आयुक्त सुंदरसिंग वसावे यांनी एका शासकीय प्रसिद्धी पत्रकान्वये कळविली आहे.

शासनाच्या 11 मार्च 2024 च्या सर्वकष धोरणानुसार आयोजित या कार्यक्रमाची सुरुवात मान्यवर व उपस्थित तृतीयपंथीयांच्या हस्ते दीपप्रज्वलन आणि महापुरुषांच्या प्रतिमा पूजनाने झाली. प्रास्ताविकात समाज कल्याण निरीक्षक सचिन वसंत जगताप यांनी कार्यशाळेमागील भूमिका स्पष्ट केली. अशासकीय सदस्य राजू ठाकरे यांनी तृतीयपंथीयांचे हक्क, कायदे व विविध कल्याणकारी योजनांबाबत सविस्तर माहिती दिली.

कार्यक्रमात पंचायत समितीच्या योजनांविषयी सहाय्यक गट विकास अधिकारी विकास राठोड यांनी मार्गदर्शन केले. गट विकास अधिकारी महेश पोतदार यांनी तृतीयपंथीयांच्या सक्षमीकरणासाठी पंचायत समितीमार्फत सर्वतोपरी सहकार्य करण्यात येईल असा विश्वास दिला; तसेच घरकुल योजनेचा लाभ मिळवून देण्याबाबत आश्वस्त केले. सामाजिक न्याय व विशेष सहाय्य विभागाच्या 13 मार्च 2026 च्या शासन निर्णयानुसार तृतीयपंथीयांसाठी सुरू केलेल्या ‘बीज भांडवल योजने’अंतर्गत व्यवसाय व कर्ज प्रकरणांच्या प्रक्रियेची माहिती सचिन जगताप यांनी दिली.

या कार्यक्रमास विस्तार अधिकारी संजय मराठे, अशासकीय सदस्य इरफान पिंजारी, बार्टी संस्थेच्या अतिरिक्त प्रकल्प अधिकारी मीनाक्षी दांडवेकर, स्मार्ट सर्व्हिसेसचे शुभम जावरे, राकेश पावरा यांच्यासह तृतीयपंथी प्रतिनिधी गौरी गुरु आरती नायक, गोपी जान, सनम जान, सोनाली कुवर, शिवानी कर्मा आदी उपस्थित होते.