नंदुरबार l प्रतिनिधी-
नंदुरबार जिल्ह्याचे शिल्पकार, माजी आदिवासी विकास मंत्री तथा विद्यमान आमदार डॉ. विजयकुमार गावित यांच्या प्रकृतीत लवकर सुधारणा व्हावी यासाठी भारतीय जनता पक्षाच्या माजी खासदार तथा ‘संसद रत्न’ डॉ. हिना गावित यांनी शनिदेवाच्या चरणी प्रार्थना करत साकडं घातलं.
आ. डॉक्टर विजयकुमार गावित यांच्या प्रकृतीत दोन महिन्यांपूर्वी हृदयविकारामळे बिघाड झाला होता. त्यावरील उपचार चालू असल्यामुळे मुंबई येथील रुग्णालयात काही आठवड्यांपासून दाखल आहेत.
पूर्वीपेक्षा आता प्रकृतीत सुधार होत असून सर्व प्रकारच्या उपचारांना उत्तम प्रतिसाद देत असल्याचे गावित परिवाराकडून सांगण्यात आले आहे. तथापि पूर्वीप्रमाणे ते कार्यरत व्हावेत यासाठी त्यांचे सर्व हितचिंतक प्रार्थना करीत असून त्यांच्या भेटीची प्रतीक्षा करीत आहेत. या सर्व पार्श्वभूमीवर डॉ हिना गावित यांनी नंदुरबार तालुक्यातील शनी मांडळ येथे जाऊन महाराष्ट्रातील प्रसिद्ध देवस्थान श्री शनि देवाच्या मंदिरात विधिवत पूजन केले. तसेच डॉ.विजयकुमार गावित यांच्या उत्तम आरोग्यासाठी श्री.शनि देवाच्या चरणी साकडे घातले. शनी मंदिराचे पुजारी तथा प्रसिद्ध पुरोहित पांढारकर गुरुजी यांनी मंत्रोच्चार केले.
याप्रसंगी शनी महाराज मंदिर ट्रस्ट अध्यक्ष दिलीप पाटील, माजी जिल्हा परिषद सदस्य प्रवीण पाटील, सामाजिक कार्यकर्ते जगदीश पाटील, हिम्मत पाटील, महेंद्र पाटील, भटू धनगर, महेंद्र राजपूत, चिंधू धनगर, प्रकाश भिल, विवेक पाटील यांच्यासह ग्रामस्थ उपस्थित होते. काही दिवसांपूर्वीच गुजरात राज्यातील डेडीयापाडा येथे वसलेले आदिवासींचे कुलदैवत देव मोगरा माता मंदिरात जाऊन डॉ. हिना गावित यांनी पारंपरिक विधीनुसार देव मोगरा मातेचे पूजन केले होते व आमदार डॉ. विजयकुमार गावित यांच्या प्रकृतीत लवकर सुधारणा व्हावी यासाठी देवीचरणी प्रार्थना केली होती.
