नंदुरबार l प्रतिनिधी-
होळी उत्सवाच्या पारंपरिक कार्यक्रमांतर्गत यंदाही नंदुरबार शहरात श्री जगदंबा देवी अवतार सोहळ्याचे आयोजन करण्यात आले आहे. मांगल्य सेवा संस्था, नंदुरबार यांच्या वतीने आयोजित हा धार्मिक व पारंपरिक सोहळा दि. ८ मार्च २०२६ (रविवार) रोजी सायंकाळी ६ वाजता सुरू होणार असल्याची माहिती संस्थेचे अध्यक्ष सुभाष जानवे यांनी प्रसिद्धीपत्रकाद्वारे दिली आहे.
या सोहळ्याची सुरुवात कमानी दरवाजा परिसरातील श्री. भास्कररावजी जोशी यांच्या निवासस्थानापासून होईल. तेथून देवीचा अवतार व मिरवणूक शहरातील विविध मार्गांवरून काढण्यात येणार असून अनेक ठिकाणी भक्तांना दर्शनाची संधी मिळणार आहे.
मिरवणुकीचा मार्ग पुढीलप्रमाणे राहणार आहे –
कमानी दरवाजा येथून सुरुवात होऊन शिवाजी चौक होळी प्रदक्षिणा, शिवाजी चौकाजवळील जुने मधुरम हॉस्पिटल मार्ग, जंक्या बाजार पोस्ट ऑफिस गल्ली, जंक्या बाजार नगर परिषद टॉवरसमोर, जंक्या बाजार मुख्य चौक, लोकमान्य टिळक मार्गावरील राजवाडा समोरील मारुती मंदिर परिसर, शिरीष मेहता रोड होळी प्रदक्षिणा, सराफ बाजार – टिळक पथ – फडके चौक, गुजवाडी परिसर, बालाजी वाडा व बालाजी मंदिर परिसर, सोनार खुंट, संकट मोचन मारुती चौक, विठ्ठल मंदिर चौक अशा मार्गाने मिरवणूक काढली जाईल.
यानंतर श्री गणपती मंदिर येथे देवीचा विसर्जन सोहळा पार पडणार आहे.
या पारंपरिक धार्मिक कार्यक्रमाला भाविकांनी मोठ्या संख्येने उपस्थित राहून दर्शनाचा लाभ घ्यावा, असे आवाहन मांगल्य सेवा संस्था, नंदुरबार यांच्यावतीने करण्यात आले आहे.
