नंदुरबार l प्रतिनिधी-
पवनऊर्जा प्रकल्पातून कॉपर केबल चोरी करून पसार होणाऱ्या तिघांना पोलिसांनी शिताफीने अटक केली. चौकशीदरम्यान एका संशयिताने पोलिसांच्या डोळ्यात मिरची स्प्रे फवारून पळ काढण्याचा प्रयत्न केला; मात्र पोलिसांनी तत्परतेने कारवाई करत त्यालाही जेरबंद केले. ही घटना सोमवारी (दि. १६ फेब्रुवारी) काळमदेव–शनिमांडळ रस्त्यावर घडली.
नंदुरबार तालुका पोलिस ठाण्याचे पोलिस निरीक्षक दिनेश भदाणे यांना शनिमांडळ ते काळमदेव मार्गावरून पवनऊर्जा प्रकल्पातील कॉपर केबल चोरी करून काही जण पळत असल्याची माहिती मिळाली. त्यानुसार शनिमांडळ गावाच्या पुढे सापळा रचण्यात आला. दरम्यान एमएच १८ बीझेड ३१३७ क्रमांकाचे वाहन येताना दिसल्याने ते थांबवून तपासणी करण्यात आली. वाहनातील शकिल लतीफ खाटीक (३९) व युनुस शहा हमीद शहा फकीर (३४), दोघेही रा. दोंडाईचा, जि. धुळे, यांच्याकडे कॉपर केबल व वजन काटा आढळून आला.
आधी ताब्यात घेतलेल्या दोघांकडून चौकशी केली असता, त्यांच्या मागून येणाऱ्या चारचाकी वाहनात आणखी एक इसम असल्याची माहिती समोर आली. पोलिसांनी संबंधित वाहन थांबवण्याचा प्रयत्न केला असता चालकाने वाहन वेगाने पळवून नेण्याचा प्रयत्न केला. पाठलाग करून त्याला अडविण्यात आले असता त्याने पोलिसांच्या डोळ्यात मिरची स्प्रे फवारला. तरीही पोलिसांनी धैर्याने कारवाई करत त्याला ताब्यात घेतले. त्याची ओळख मेहबूब लुकमान पिंजारी (३९), रा. दोंडाईचा, जि. धुळे अशी पटली. त्याचे एमएच ०४ एफए १८५२ क्रमांकाचे वाहनही जप्त करण्यात आले.
या प्रकरणी शकिल लतीफ खाटीक, युनुस शहा हमीद शहा फकीर आणि मेहबूब लुकमान पिंजारी यांच्याविरोधात नंदुरबार तालुका पोलिस ठाण्यात गुन्हा दाखल करण्यात आला आहे. पोलिसांनी दोन्ही वाहने, ४६७ किलो कॉपर वायर, तीन मोबाईल फोन व रोख रक्कम असा एकूण ८ लाख १५ हजार ३२५ रुपयांचा मुद्देमाल जप्त केला.
ही कारवाई पोलिस अधीक्षक श्रवण दत्त एस, अपर पोलिस अधीक्षक आशित कांबळे व उपविभागीय पोलिस अधिकारी संजय महाजन यांच्या मार्गदर्शनाखाली पोलिस निरीक्षक दिनेश भदाणे, पोलिस उपनिरीक्षक सुनील भामरे, सहायक पोलिस उपनिरीक्षक मोतीराम भामरे, पोलिस हेड कॉन्स्टेबल विनायक सोनवणे, राजेंद्र धनगर, सचिन सैंदाणे व अरुण चव्हाण यांच्या पथकाने केली.
