नंदुरबार l प्रतिनिधी-
तिथीप्रमाणे ३५२ व्या शिवराज्याभिषेक दिना निमित्ताने श्री शिवछत्रपती पालखी शोभायात्रा पद्य आणि घोषणांचा गजरात भावपूर्ण वातावरणात संपन्न झाली. हिंदु सेवा सहाय्य समिती आयोजित श्री शिवछत्रपती पालखीशोभायात्रा सोमवारी सायंकाळी ५:३० वाजता मोठा मारुती मंदिरजवळ छ. शिवाजी महाराज यांचा मूर्तीचे दुधाभिषेक आणि पालखी पूजन प. पू. श्री सोमेश्वरानंदजी महाराज (राष्ट्रीय महामंत्री: शंभू पंच अग्नी आखाडा झाशी) यांच्या हस्ते करण्यात आले.
सर्वप्रथम संपूर्ण घोषणा आणि प्रेरणा मंत्र विनायक राजपूत याने म्हटले, तद्नंतर वेदमंत्र वेदमूर्ती रविंद्र पाठक गुरुजी यांनी म्हटले यावेळी संत श्री प. पू. सोमेश्वरानंदजी महाराज यांनी छ शिवाजी महाराज यांच्या मूर्तीचे दुग्धाभिषेक, जलाभिषेक आणि पूजन केले. पालखीमध्ये छ. शिवाजी महाराज यांची सिंहासनावर आरूढ मूर्ती पूजनासाठी ठेवण्यात आली होती. शोभायात्रेत सर्व प्रथम धर्मध्वज, राजमाता जिजाऊ माँसाहेब, छ. शिवाजी महाराज वेशभूषेतील बालक पालखीसोबत आणि पाठीमागे सर्व शिवभक्त शोभायात्रेत घोषणा, पद्य म्हणत सहभागी झाले होते. मार्गात श्री शिवछत्रपती पालखीचे भाविकांनी पूजन आणि फुले उधळून स्वागत केले.
शोभायात्रा श्री मोठा मारुती मंदिर, नाटय मंदिर,मंगळ बाजार मार्गे शिवस्मारक या ठिकाणी संपन्न झाली. याठिकाणी रामराज्य, हिंदवी स्वराज्य ते हिंदुराष्ट्र हा प्रवास कसा झाला, कसा करायचा आहे हे आम्हाला छ. शिवाजी महाराज यांनी आपल्या कृतीतून शिकविले आहे शिवराज्याभिषेक दिनाचा या पवित्र दिवशी आपणही हिंदुराष्ट्र स्थापनेचा कार्यात कृतीशील होऊ या असे आवाहन धर्मसेवक नरेंद्र यांनी मनोगतातून व्यक्त केले. यानंतर छ. शिवाजी महाराज यांची आरती प पू सोमेश्वरानंदजी महाराज यांच्यासह शिवभक्त यांनी केली. सुत्रसंचालन व आभार प्रदर्शन राजु चौधरी यांनी व्यक्त केले.
शोभायात्रा भावपूर्ण संपन्न होण्यासाठी हिंदु सेवा सहाय्य समितीचे जितेंद्र राजपूत,राजू चौधरी, जयेश भोई, सुयोग सूर्यवंशी, संदीप राजपूत, विजय जोशी, विनायक राजपूत, पृथ्वीसिंह राजपूत या धर्मसेवकांनी परिश्रम घेतले.
