नंदुरबार l प्रतिनिधी-
अक्कलकुवा तालुक्यातील मौजे कोराई येथे ग्रामपंचायतीचे लोकनियुक्त सरपंच राजु तडवी यांच्याविरुद्ध दाखल झालेल्या अविश्वास प्रस्तावावर चर्चा करण्यासाठी सोमवार 10 फेब्रूवारी 2025 रोजी सकाळी 11 वाजता ईरा इंटननॅशनल स्कुल कोराई येथे विशेष ग्रामसभेचे आयोजन करण्यात आले आहे, असे सहायक जिल्हाधिकारी तथा उपविभागीय अधिकारी अनय नावंदर यांनी एका शासकीय प्रसिद्धी पत्रकान्वये कळविले आहे.
अविश्वास प्रस्ताव 27 जानेवारी 2025 रोजी तीन- चतुर्थांश मतांनी संमत झाला असून उपविभागीय अधिकारी अनय नावंदर यांच्या अध्यक्षतेखाली अविश्वास ठारावावर मतदानाचे कामकाज होणार आहे.
*ग्रामसभेत हे कामकाज करण्यात येईल:*
• *मतदान प्रक्रिया:* विशेष ग्रामसभेच्या दिवशी अविश्वास ठराव संमत करण्यासाठी शिरगणना पद्धतीने साध्या बहुमताने मतदान घेण्यात येईल.
• *मतदानाचा अधिकार:* विधानसभेच्या मतदार यादीत नाव असलेल्या सर्व सदस्यांना मतदानाचा अधिकार असेल.
• *चर्चेचा विषय:* सदर विशेष ग्रामसभेचे आयोजन फक्त अविश्वास ठरावास संमती देण्यासाठी केले जाणार असल्याने इतर विषयांवर चर्चा होणार नाही.
• *ठरावाची मान्यता:* विशेष ग्रामसभेत उपस्थित राहून शिरगणना पद्धतीने मतदान केलेल्या ग्रामसभा सदस्यांच्या साध्या बहुमताने अविश्वास ठराव मंजूर झाला असेल तर सदरचा अविश्वास ठराव संमत झाला असे समजण्यात येईल.
• *ठरावाची फेटाळणी:* विशेष ग्रामसभेमध्ये उपस्थित राहून मतदान केलेल्या ग्रामसभा सदस्यांच्या साध्या बहुमताने अविश्वास ठराव फेटाळला असेल तर सरपंच पद कायम राहील.
• *ओळखपत्र:* सदर विशेष ग्रामसभेस येताना ग्रामपंचायतीच्या मतदारांनी सोबत राज्य निवडणूक आयोगाने विहित केलेपैकी ओळखीचा पुरावा सोबत बाळगणे आवश्यक आहे.
कोराई ग्रामपंचायतीमधील सर्व नागरिकांना या विशेष ग्रामसभेस उपस्थित रहावे असेही आवाहन सहायक जिल्हाधिकारी तथा उपविभागीय अधिकारी अनय नावंदर यांनी शासकीय प्रसिद्धी पत्रकान्वये केले आहे.
