नंदुरबार l प्रतिनिधी
महाराष्ट्राचे आदिवासी विकास मंत्री नामदार डॉक्टर विजयकुमार गावित यांच्या संकल्पनेतून नंदुरबार विधानसभा क्षेत्रातील ज्येष्ठ नागरिकांना लाभ देता यावा.यासाठी शहादा तालुक्यातील प्रकाशा आणि जयनगर येथे दिनांक 10 सप्टेंबर 2024 रोजी घेण्यात आलेल्या नोंदणी शिबिरात शेकडोच्या संख्येने उपस्थित राहून वृद्ध नागरिकांनी नोंदणी केली. जवळपास 2000 हून अधिक ज्येष्ठ नागरिकांनी या नोंदणीचा लाभ घेतला.
सामाजिक न्याय व विशेष सहाय्य विभाग अंतर्गत मुख्यमंत्री वयोश्री योजना व मुख्यमंत्री तीर्थ दर्शन योजनेचे लाभ देण्यासाठी हे नोंदणी व मार्गदर्शन शिबिर आयोजित करण्यात आले. महाराष्ट्राचे आदिवासी विकास मंत्री नामदार डॉक्टर विजयकुमार गावित, नंदुरबार जिल्हा परिषदेच्या अध्यक्ष डॉक्टर सुप्रिया गावित आणि डॉक्टर हिना गावित यांच्या प्रमुख उपस्थितीत पार पडलेल्या या शिबिरात प्रकाशालगतच्या आणि जयनगर लगतच्या गावांमधील शेकडोच्या संख्येने जेष्ठ नागरिकांनी गर्दी केली.
आदिवासी विकास मंत्री नामदार डॉक्टर विजयकुमार गावित यांच्या प्रयत्नांमुळे इतक्या योजनांचा लाभ ग्रामीण भागातील प्रत्येकापर्यंत पोहोचतो यावर अनेक उपस्थित ग्रामस्थांनी समाधान आणि कौतुक करणाऱ्या प्रतिक्रिया व्यक्त केल्या. नंदुरबार जिल्हा परिषदेच्या सभापती हेमलता शितोळे, गावामध्ये जिल्हा परिषदेचे माजी अध्यक्ष रामचंद्र पाटील, ज्येष्ठ नेते डॉक्टर कांतीलाल टाटीया, शशिकांत शितोळे यांच्यासह स्थानिक जिल्हा परिषद सदस्य पंचायत समिती सदस्य आणि ग्रामीण कार्यकर्ते मोठ्या संख्येने उपस्थित होते.
मंत्री नामदार डॉक्टर विजयकुमार गावित यांनी प्रमुख भाषणात सांगितले की शेतकरी कामगार महिला आणि बेरोजगार युवक असा कोणताही घटक राहिलेला नाही ज्यांच्यासाठी महायुती सरकारने योजना दिलेल्या नाही. आता विद्यमान स्थितीत सुद्धा शेतात चालणाऱ्या वीज पंपाचे बिल माफ करण्याचा महाराष्ट्र शासनाने निर्णय घेतला आणि त्यामुळे नंदुरबार जिल्ह्यातील 45 हजार 565 शेतकऱ्यांना 684 कोटी 98 लाख रुपयांचे थकीत वीज बिल माफ करण्यात आले आहे. त्याचबरोबर नंदुरबार विधानसभा मतदारसंघातील शेतकऱ्यांना देखील थकीत वीज बिल माफीचा लाभ व्हावा आणि त्यांची कर्जातून मुक्ती व्हावी म्हणून आपण प्रयत्न केल्याने नंदुरबार विधानसभा क्षेत्रातील सुमारे 12000 हून अधिक शेतकऱ्यांना सुमारे 225 कोटी रुपयांचे वीज बिल माफ करून मिळाले आहे. नंदुरबार तालुक्यातील शेती विकासाच्या दृष्टीने हे सर्वात मोठे पाऊल आहे. नंदुरबार विधानसभा क्षेत्रातील सुमारे एक लाख महिलांना मुख्यमंत्री लाडकी बहीण योजनेचा लाभ आपण मिळवून दिला. नंदुरबार मतदार संघातल्या जास्तीत जास्त वयोवृद्ध लोकांना मुख्यमंत्री तीर्थ दर्शन योजनेचा आणि वयोश्री योजनेचा लाभ देता यावा म्हणून आपण भव्य नोंदणी शिबिर घेतले. वैयक्तिक आणि सामूहिक लाभ देणारे असे काम आपण यापुढेही करत राहू असे मी अभिवचन देतो, असेही मंत्री गावित म्हणाले.
नंदुरबार जिल्हा परिषद अध्यक्ष डॉक्टर सुप्रिया गावित आणि संसद रत्न डॉक्टर हिना गावित यांनी देखील विविध योजनांच्या माध्यमातून केलेल्या विकास कामांचा आढावा मांडला.
