नंदुरबार l प्रतिनिधी
शासनाने 15 वर्षाच्या आतील सर्व परिवहन वाहनांचे योग्यता प्रमाणपत्र नुतनीकरणास विलंब झाल्यानंतर प्रतिदिन आकारण्यात येणारा विलंब शुल्क आकारण्यास स्थगिती दिली असल्याचे, उप प्रादेशिक परिवहन अधिकारी किरण बिडकर यांनी एका शासकीय प्रसिद्धी पत्रकान्वये कळविले आहे.
वाहनांचे योग्यता प्रमाणपत्र नुतनीकरणाचे विलंब शुल्क प्रतिदिन रुपये 50 आकारण्याची कार्यवाही सुरु करण्यात आली होती. सदर विलंब शुल्क माफ करणे, विलंब शुल्काच्या आकारणीमधून सूट देणे याबाबत ऑटोरिक्षा-टॅक्सी चालक संघटना तसेच विविध परिवहन संवर्गातील वाहन धारकांच्या संघटना यांनी शासनास निवेदने सादर केली होती.
त्यानुसार शासनाने वाहनधारक व विविध संघटना यांच्या निवेदनांचा व मागणीचा सहानुभूतीपूर्वक विचार करुन 15 वर्षाच्या आतील सर्व परिवहन वाहनांचे योग्यता प्रमाणपत्र नुतनीकरणास विलंब झाल्यानंतर प्रतिदिन रुपये 50 एवढे विलंब शुल्क आकारण्याच्या कार्यवाहीस पुढील आदेश होईपर्यंत स्थगिती दिली आहे. याची जिल्ह्यातील सर्व वाहन धारकांनी नोंद घ्यावी व आपल्या वाहनाचे योग्यता प्रमाणपत्र नुतनीकरणासाठी उप प्रादेशिक परिवहन कार्यालयात सादर करावे, असेही श्री. बिडकर यांनी शासकीय प्रसिद्धी पत्रकान्वये कळविले आहे.
