नंदुरबार l प्रतिनिधी
नंदुरबार लोकसभा मतदार संघात दिव्यांग व वृध्द मतदार यांच्यासाठी गृहमतदानासाठी ८ व ९ मे रोजी पहिली फेरी होणार असल्याने त्यांनी मतदानासाठी घरीच थांबावे असे आवाहन जिल्हाधिकारी मनीषा खात्री यांनी केली आहे.
श्रीमती खत्री पुढे म्हणाल्या, मतदान यंत्रांचे सेटिंग व सिलींग दि.३ ते ५ मे. २०२४ रोजी त्या-त्या विधानसभा मतदार संघासाठी निश्चित केलेल्या ठिकाणी करण्यात येणार आहे. तसेच मतदारांसाठी मतदार चिठठीचे वाटप बीएलओ यांच्यामार्फत दि.१ ते ७ मे २०२४ घरोघरी भेट देऊन केले जाणार आहे. मतदार चिठठी ही मतदानासाठी ओळखीचा पुरावा नाही, मतदार चिठठी सोबत आयोगाने विहीत पुराव्यांपैकी एक पुरावा आणने आवश्यक आहे.
तसेच दिव्यांग व ८५ वर्षे वयावरील मतदारांच्या गृह मतदानासाठी पहिली फेरी दि. ८ व ९ मे रोजी तर दुसरी फेरी दि.१० व ११ मे २०२४ रोजी होणार आहे. नंदुरबार लोकसभा मतदार संघात दिव्यांग मतदार १० हजार ४४ आहेत. त्यापैकी केवळ २६९ मतदारांनी गृहमतदानासाठी नोंदणी केली आहे. ८५ वर्षावरील एकुण १९ हजार ३१० मतदार आहेत. त्यापैकी १ हजार १५४ मतदारांनी गृहमतदानासाठी नोंदणी केली आहे, असेही श्रीमती खत्री यांनी सांगितले.