नंदुरबार l प्रतिनिधी
प्रादेशिक पर्यटन विकास योजनेंतर्गत मंजुर झालेल्या कामांची उच्च न्यायालयाने स्थगिती उठवली दिली आहे.त्यामुळे नंदुरबार तालुक्यातील साडेसाती मुक्ती श्रीक्षेत्र शनिमांडळचा विकास होणार असून,त्यासाठी ३ कोटी ९ लाख ९३ हजार रुपयांच्या निधीला प्रशासकीय मान्यता मिळाल्याची माहिती शिवसेनेचे नेते तथा माजी आमदार चंद्रकांत रघुवंशी यांनी दिली.
याबाबत माजी आ.रघुवंशी यांनी सोमवारी काढलेल्या प्रसिद्धी पत्रकात म्हटले आहे की, पर्यटन व सांस्कृतिक कार्य विभागाच्या प्रादेशिक पर्यटन विकास योजनेअंतर्गत पर्यटन स्थळांच्या ठिकाणी पायाभूत सुविधा पुरवण्यासाठी निविदा मागविण्यात आल्या होत्या. त्यानंतर काही निविदांना तांत्रिक अडचणी आल्या होत्या त्यामुळे कामांना स्थगिती देण्यात आली होती. परंतु, आता उच्च न्यायालयाच्या आदेशाने सरसकट संगती उठवण्यात आलेली आहे.
कामात कोणत्याही प्रकारची अनियमितता होणार नाही याची दक्षता घेण्यात यावी असे पर्यटन व सांस्कृतिक कार्य विभागाचे उपसचिव यांनी काढलेल्या परिपत्रकात नमूद करण्यात आले आहे.
संपूर्ण महाराष्ट्रात प्रसिद्ध असलेल्या एकमेव साडेसाती मुक्तीपीठ श्रीक्षेत्र शनिमांडळ येथे पर्यटन विकास विभागाकडून विकास कामांना लवकरच सुरुवात करण्यात येणार आहे.त्यामुळे शनी भक्तांमध्ये आनंदाचे वातावरण आहे. काही तांत्रिक मुद्द्यांमुळे कामांच्या निविदांना स्थगिती देण्यात आली होती त्यामुळे विकास कामे होऊ शकली नाहीत आता उच्च न्यायालयानेच स्थगिती उठवल्यामुळे विकास कामे होतील. शनिमांडळ गावातील नदी ते शनी मंदिर पर्यंत ट्रीमिक्स पद्धतीने रस्ता तयार करणे,मंदिर चौक सिमेंट ट्रीमिक्स करणे त्याचप्रमाणे गावातील रस्त्यांवर पथदिवे बसवण्यात येतील त्यासाठी ३ कोटी ९ लाख ९३ हजार रुपयांची प्रशासकीय मान्यता देण्यात आल्याचे शिवसेनेचे नेते तथा माजी आमदार चंद्रकांत रघुवंशी यांनी म्हटले आहे.
